Tamantu sfragellu in Turchìa è Sirìa ! Ci avvicinemu di i 40.000 morti, vale à dì quasi tutta a pupulazione bastiaccia ! Un bilancciu torna sottu evaluatu d’appressu à l’Urganisazione di e Nazioni Unite chì pensa ch’ellu ci volerà forse duppià stu contu macabru. U terramotu di 7,8 nant’à a scala di Richter hà minatu u 6 di ferraghju scorsu i dui paesi. Una simana dopu, sò centunaie di millaie torna, imprigiunati ind’è e ruine di e so case. A Turchìa, è ancu di menu a Sirìa, ùn sò ghjunti à risponde sùbitu à l’urgenze di i bisogni di succorsu. Quantu pòvera ghjente, salva ma sepellita sott’à i casali sfundati, s’anu da more ? U presidente turcu, u dittatore Recep Erdogan, ùn s’hè affaccatu sopra piazza chè cinque ghjorni dopu à a catastrofa. Dopu à u spaventu è l’addisperu di i vivi, cresce oghje a còllera di a pupulazione.
I succorsi sò cumplicati chì e ruine sò fràciche è minàccianu di sfundassi torna mettendu in perìculu i salvatori. In più, si travaglia cù u freddu è timperature cutrate, a piossa, a neve… Millaie di ghjente sò ghjunte da tutte e parte di u paese per porghje aiutu. Dòrmenu fora cum’è i sopraviventi. Tendoni di furtuna sò urganizati, è si prova à sparghje cuprèndule è vistiti caldi. I guverni aurupei anu mandatu specialisti dinù ma i disguasti sò cusì tremendi ch’ellu hè diffìciule d’avvanzà. U mìnimu soffiu di vita, u mìnimu rumore pruvucheghja catene umane per circà a ghjente cacciendu e petre una per una. Ma più passa u tempu, è più s’indebbulisce sta ghjentarella imprigiunata sott’à stu scumpientu senza avè a forza di fassi sente. I rughjorni frà i più pòveri, è a ghjente a più addebbulita sò e prime vìttime, ma ancu i casamenti di lussu si sò sfundati ! U guvernu turcu hà lanciatu centinaie di prucedure ghjudiziarie è quasi 150 inchieste per dumandà conti à i prumutori immubiliari ch’ùn anu micca rispettatu e règule di custruzzione contr’à i terramoti. Sò già parechje arrestazioni è uni pochi cèrcanu à fughje u paese. Ci volerà ancu circà e rispunsabilità in i cuntrolli è u lascià corre di l’autorità di tutte e mamme. 12.000 casali si sò sfundati in Turchìa in piena notte à 4 ore di mane, intrappulendu a corcia ghjente ch’ùn hà avutu u tempu di scappà. I cinnini sò i più tocchi.
In Sirìa, u rughjone sinistratu conta assai rifugiati di a guerra… a disgrazia chjama a disgrazia… A guerra, a crisa ecunòmica, a crisa sanitaria, è oghje un terramotu frà i più viulenti ch’ella appìi cunnisciutu a pianetta ! Hè diffìciule di porghje l’aiutu umanitariu chì parechji curridoghji sò chjosi da u guvernu sirianu per vìa ch’elle sò zone ribelle. U presidente di l’Urganisazione Mundiale di a Salute hè andatu soprapiazza per neguzià u passagiu di l’aiutu umanitariu. U mondu ellu si cummove di pettu à e stampe di salvamenti miraculosi d’omi, di donne, di zitelli bluccati dapoi ghjorni, in u freddu è u santavugliu, senza beie nè manghjà. Parechje cità anu smaritu di a carta. È tocca avà à inseppellisce i morti… ma ùn si sà induve… 26 millioni di personi sò sinistrati. I ginnasi, e scole, sò requisiziunati. 40.000 tende pròvanu à offre i primi agrotti. Ùn bàstanu. Parechji dòrmenu in carrughju frà mezu e ruine. Precate per elli. •
