18.446 morti, 160.000 ghjente spiazzati nant’à un circondu di 100 chilòmetri, quantu traumatizati ? Ùn si parla mancu di tutta sta corcia ghjente, sò decine è decine, à èssesi tombu, addisperati di lascià per sempre a so terra, i so lochi, tutti i so ricordi… Soprapiazza ùn cala micca a cuntaminazione. Puru sò millaie di tunnellate di terra cuntaminate chì sò state ruspate nant’à parechje centìmetri eppò messe ind’è sacchi di plàsticu è ammansate in parechji lochi di e zone dette « interdette ». Millioni di metri cubi d’acqua torna sò state lampate per anacquà i reatori di a centrale, o per nettà vitture, case, materiale… Millaie di metri cubi sò state cunservate per ùn lampale in u Pacìficu. Ma a maiò parte hè fallata à u mare. A catastrofa hà cusì pruvucatu a più grande catastrofa marina di a storia. U Pacìficu hè cuntaminatu. In i reattori 1, 2, è 3, u cumbustìbule s’hè struttu, scambiatu in corium, ssa spezia di magmà chì si trafura tutu, d’un calore tremendu è d’un livellu di radiazione scemu : si pò tumbà un omu in 30 seconda è in qualchi minute si sciappa ancu i robbò. Si sà dunque qu’ellu hè struttu u corium, per vìa di u livellu di a cuntaminazione, ma ùn si sà induv’ellu hè passatu. S’ellu hè firmatu in a centrale, bluccatu da u spaziu di cunfinamentu, tantu megliu. Ma pò avellu ancu tufunatu è penetratu a terra. Sin’à induve ? Pò viaghjà parechji chilòmetri cusì sottu terra, sin’à ch’ellu trovi una grotta d’acqua. Tandu u perìculu hè grande di vede ssu magmà caldu caldu trasfurmà l’acqua in vapore, culà torna in timperatura è schiattà cù a pressione… U smantellimentu di a centrala hè previstu torna di durà 40 anni omancu per un prezzu di più di 20.000 milliardi di yen, vale à dì omancu 165 milliardi d’auri. Vale à dì torna, u doppiu ch’omu avìa previstu. È ùn hè ancu finita di vede cresce a spesa !
Hè per quessa chì u guvernu giappunese vole fà vultà i rifugiati. Puru i lochi ùn sò ancu securizati. Ci sò sempre cuntaminazione sceme sopralocu, i soli à pudè campaci sò i cignali radiuattivi. Sò millaie à èssesi riprudutti è à trascinà mezu à case viote. U guvernu hà mandatu squadre di cacciadori per tumbali… sarèbbenu trà 3000 à 13.000. Per fà vultà a ghjente u guvernu giappunese vole toglie l’aiuti finanziarii dati à a ghjente spiazzata. Numerosi frà elli pènsanu chì u guvernu vole falli vultà per vìa di i ghjochi olìmpichi chì s’anu da passà à u Giappone in 2020 è cusì fà crede chì u prublema nucleariu hè statu scioltu.
Stumachjeghju.
Fabiana Giovannini.
