Èccuci amichi lettori, st’annata 2024 hè à 58a annata di vita di u vostru settimanale !
Arritti hè natu l’8 di dicembre 1966. È ghjè sempre arrittu ! N’avemu cunnisciutu lotte è rivolte, vittòrie è scunfitte, brame è addisperi ! Arritti hà accumpagnatu a rinàscita d’una nazione, scrasata in u 1769 in Ponte Novu, ma d’un spìritu mai spentu.
« Le titre, Arritti, c’est un cri » dicìa Massimu Simeoni à a ghjurnalista di France 3 Via Stella chì l’interrugava l’11 di dicembre di u 2016. Festighjàvamu tandu i nostri cinquant’anni è u nostru fundatore spiecava u perchè di l’imàgina nant’à u primu nùmaru : « la tête de maure, on lui a donné un profil un peu pirate, mais avec le fusil et la grand pioche, c’est les armes des pionniers ! »… Ghjè dì ciò ch’ella hè stata a missione è l’òpera d’Arritti ! Tandu, a Corsica avìa persu a memoria, pochi sapìanu u perchè di a testa mora, pochi cunniscìanu a gloriosa storia di a Corsica paulista… Tuttu era da fà rinasce ! « On n’était pas pris en compte par la presse qui était engagée avec des politiques nationaux, droite et gauche, pour ou contre De Gaulle, et il fallait que l’on se fasse entendre. Par déduction logique on s’est dit il nous faut notre journal ! » spiecava torna Massimu Simeoni.
Sta scumessa hè stata tenuta, è mantenuta !
Arritti hà francatu cusì più d’un mezu sèculu di stòria è partecipatu à tutte e lotte, cuntribuitu à apre a strada, à sveglià a cuscenza, à infurmà, à furmà, à fà dinù, quand’ellu hà messu in ballu, per un dettu, a dimarchja di capitale rìsicu Femu Quì, o più vicinu à noi, sustenendu l’insignamentu immersivu di Scola Corsa. Hà partecipatu cusì à mondu campagne pè a ricuniscenza di a lingua, contr’à l’incèndii devastatori, pè a prutezzione di l’ambiente, pè u sviluppu agrìculu, per un statutu fiscale, per l’autunumìa, ecc.
È oghje, Arritti, a Corsica n’hà sempre bisognu. L’autunumìa à strappà, a lingua à salvà, u paese à custruisce… Dali i mezi, ghjè cuntribuisce à fà avvanzà tutte e nostre lotte. Arritti hè una stampa indipendente chì campa solu di i so abbunamenti è di u sustegnu publicitariu. Hè un settimanale d’infurmazioni è d’anàlisi, un arnese di lotta indispensèvule.
Aiutàtelu à campà. Lighjìtelu, fàtelu leghje, abbunàtevi ! •