U 14 di lugliu 2009, Adrien Lippini perdìa a vita nant’à a strada di Biguglia à l’età di 16 anni… Era un appassiunatu di bicicletta. A strada u s’hà pigliatu è i soi, mamma, babbu, è l’amichi di u so club, anu vulsutu fà di ssu sacrifiziu inghjustu una campagna pè a vita creendu l’associu Adrien Lippini, un vélo une vie. A mamma d’Adrien, Françoise Lippini n’hè a presidente.
U so scopu hè dagisce è sensibilizà i puteri pùblichi cum’è l’automobilisti è a pupulazione da pudè viaghjà megliu inseme nant’à e strade è spàrtesi u spàziu in securità per tutti. « Alerta, cunsiglia, prupone » azzioni à prò di a custruzzione di piste ciclàbile è d’infrastrutture ch’incuragìscenu à a pràtica di u velò, in u rispettu di u còdice di a strada. Adrien Lippini, un vélo une vie forma i giòvani, sviluppendu scole urbane in e cità, da u primariu à l’Università, e personi maiò, e stituzioni, e cumune è i quartieri priuritàrii. Urganizèghja manifestazioni di sensibilisazione cum’è u Tour partage de la route. Quist’annu s’hè fattu in trenu, à bicicletta è à pedi, da u 29 d’aprile à u primu di maghju. Hè stata l’uccasione pè i giòvani di l’associu Leia è OPRA da Bastia à a Balagna, passendu pè u Borgu, d’incuragisce a ghjente à spàrtesi a strada è à rispettà à securità stradale, cù dibàttiti è testimogni. « Purtemu i puteri pùblichi à sviluppà piste ciclàbile, cù azzioni d’infurmazione è di pruposte nant’à i perìculi ch’elli scòntranu regularmente i ciclisti. Ci impegnemu da ch’elli svilùppanu u più pussìbule infrastrutture è assesti di securità pè a pràtica di u velò » spieca l’associu.
Frà e rivendicazioni : mette in òpera una vera pista ciclàbile nant’à a strada di a Marana ; indità un itineràriu pè u velò da u Nordu à u Sud, è da l’Este à l’Ueste di l’ìsula ; limità a vitezza à 90 chilòmetri à l’ora in i dui sensi trà Casatorra è Borgu, u tempu d’accuncià l’infrastrutture di securità ; pone pannelli « attenzione ciclisti »è « spartimu a strada » nant’à tutte e strade ; è « interdizzione à i ciclisti » nant’à u spassimare in Bastia, da pudè alertà nant’à a presenza di u tunellu ; pone pannelli eletrònichi nant’à l’àcchisi principalli per diffusà messagi di securità stradale pè i ciclisti è chjamà à u rispettu di e distanze ; stallà à u locu induv’ellu ci hè statu un accidente, una siluetta nera cù l’età di a persona ch’hè stata tomba quì.
« A Corsica puderìa esse un esempiu à u livellu naziunale in matèria di sviluppu durèvule cù ste creazioni di piste ciclàbile » spieca torna l’associu, « ci hè dui interessi per l’ìsula : sviluppà u sport ciclistu in club o nò, è sviluppà un turìsimu eculògicu cù a pussibilità di creazione d’impiechi intornu à ssu tipu di sughjornu ».
Millaie di sculari sò stati sensibilizati dapoi u drama chì s’hè pigliatu a vita d’Adrien. L’associu chì porta u so nome agisce da chì mai più una cusì bella giuventù sìa arrubata à i soi. •
Infurmazione è cuntattu : www.unvelo-unevie.com