43.040 elettori anu incuragitu à Marine Le Pen in Corsica. Ch’ellu sia votu di « cuntestazione », votu di cunvinzione, brama di sciagura, ricerca di distabilisazione è d’ingattivera per ghjunghje un pocu di più à staccassi di a Francia, pocu imprema, ferma un incuragime. U passu trà a « cuntestazione » è u sustegnu face qualchi tempu già ch’ellu hè statu francatu è l’elettore FN ùn si piatta più. Bellu u cuntrariu, a dice è a face sapè, ancu s’ellu hè sempre daretu à un scrinu cù i so « like » è cummenti di e rete suciale. Certi ancu si rivendichèghjanu senza vergogna è vulerèbbenu ch’ella diventi « nurmalità ».
Ghjunghjerà forse à spàrghjesi più ufficialmente da quì à pocu ssu sustegnu, ma per avà, u fattu ghjè chì a trincata hè stata pigliata. Ùn s’agisce più d’elettori chì vòtanu à u FN. S’agisce d’elettori FN. Ghjente chì dìcenu a so simpatìa, è ancu a so appartenanza. Uni pochi ùn steranu tantu à francà u passu di u militantìsimu è candidati à a candidature s’anu da fà cunnosce di più in più per l’elezzioni à vene. Certi si fàcenu digià messageri è ambasciadori, sin’à truvassi di pettu à Corte di Ghjustizia, è ben intesa u messagiu ribomba ind’è l’emicìcliu di l’Assemblea di Corsica. L’eletti FN ùn vòtanu micca u pianu di lotta contr’à a precarietà per via ch’ellu puderebbe vene à difende stranieri. S’offèndenu di l’accolta d’una corcia famiglia siriana in Belgudè è s’impenserìscenu di u sustegnu à e lingue perch’è a lingua àraba puderebbe esse cuncernata… Mattematicamente, u risultatu di Marine Le Pen pare lògicu. Tutte e famiglie pulìtiche sò tocche da u sfundamentu di i partiti tradiziunali, è ancu l’elettore naziunalistu, senza indiatura nè discorsu di i so capifila, s’hè vistu lìberu di sprimà u so estru. U FN si ricupereghja elettori da tutte e mamme. In tutti i paesi è in e cità. In i quartieri sfavurizati, o quelli senza prublemi suciali. È ancu s’elli resìstenu di più chì a manca, o a diritta, i naziunalisti dèvenu fassi penseru. L’astenzione hè più forte pè i naziunalisti, prova Bastia chì sfrisgia i 40% d’astenzione, ma l’elettori FN ci sò ancu ind’è elli è u partitacciu trinca in testa in Bastia dinù. Ci hè di sicuru una riflessione prufonda da avè. Sorge dapoi qualchi tempu una spezia di neo-naziunalìsimu chì si ricupereghja i so sìmboli, bandera, Dìu, Babbu, lingua è identità… ma chì sparghje edee ch’ùn anu nunda à chì vede cù u naziunalìsimu è sò ancu à l’uppostu di e nostre brame è i nostri valori. I ghjòvani naziunalisti fèrmanu abbastanza pulitizati è pronti à dà di pettu à ssa minaccia. L’anu fatta valè in Aiacciu per dì innò à u discorsu d’odiu è di ricuperazione di Marine Le Pen. Puru, uni pochi ghjòvani ùn cunnòscenu nè i valori nè a storia di u muvimentu naziunale è si rivendichèghjanu naziunalisti, curtighjendu cù l’edee senofobe è brutte di u FN.
Attenti à a minaccia ! _
Fabiana Giovannini.
