Da chjuca chjuca mi sò sempre impegnata per l’altri, in u suciale, in a cultura, eppò dopu in pulìtica. Puru aghju sempre dettu à i mei, parenti è amichi, ch’ùn fecìa pulìtica, ma scumbattìa « per una càusa ». Ghjè ch’ella m’hè sempre parsa cumplicata, inghjusta, cumbriculosa, a pulìtica « incartata ». O piuttostu a pulitichella… a lingua corsa hè ricca ancu assai, è s’hè data parulle vàrie per sfarenzià l’andature ! Cù u tempu, è a sperienza, aghju capitu ch’ellu ci vulìa impegnassi quantunque in i partiti pulìtichi s’omu vulìa agisce nant’à u cutidianu è cambià e cose. Hè cusì ch’aghju pigliatu, à 25 anni, una carta à l’Unione di u Pòpulu Corsu, u mo primu ingagiamentu. Mi parìa u partitu chì currispundìa u più à ciò ch’eu bramava pè a Corsica, fratellanza, libertà, sulidarità, autunumìa, difesa di a lingua, difesa di l’ambiente. Hè cusì ch’aghju fattu a mo strada. L’UPC dopu hè diventata u PNC, è deci anni dopu sò stata di quelli chì avìanu vutatu à u so senu, a creazione di Femu a Corsica (à l’unanimità tandu). Sò stata dunque di quelli chì sò stati messi fora per vìa di a fedeltà à stu votu… Puru, Femu a Corsica hè statu u partitu di u ciambuttamentu stòricu, u puntu tantu aspettatu ch’hà permessu à a ghjente di francassi di u mondu anzianu per dà forza è speranza à e nostre lotte. A dinàmica hè stata magnìfica d’intusiàsimu è d’allegrìa. Ma a pulìtica ùn hè mai sèmplice, è ùn si scrive d’una strada dritta. Si face cù u cuntestu è e difficultà di u terrenu, cù i tràmpali di l’avversàrii, e manipulazioni di u Statu è di i nemichi da tutti i lati. Hè cusì. Disgraziosamente ùn si pàranu facilmente i prublemi, i sbaglii, l’inganni ancu, è i fiaschi. Nimu ùn hè perfettu è nimu ùn hè abbastanza armatu per impedìscela, l’omu è e so qualità hè fattu ancu di debbulezze. Ciò ch’imprema tandu, sò i valori è l’ostinazione militente. Perch’è un militente dà, eppò passa. È sò d’altri chì pìglianu a rileva à a so sèguita. U bisognu imperiosu hè di tene è di tramandà i valori di a demucrazìa. È tandu a pulìtica ùn pò esse sviata. Pò piglià più tempu ch’ellu parìa, pò essse intravata, pò pruvucà incumpreensioni, ma ùn pò esse sviata. Ferma stu bisognu fermu dunque, d’ùn mai scurdassi di i valori. Umanìsimu, ghjustizia, sulidarità, fede, impegnu. Hè per quessa chì u naziunalìsimu, qualesìanu e strutture chì u fàcenu campà, hà sopravissutu à e so crise, i so sbaglii, o l’intrappulate chì li sò state fatte. Face quasi 60 anni avà, chì u naziunalìsimu corsu mudernu esiste. Natu di a sumente piantata à u diciottèsimu sèculu, dettu Sèculu di i Lumi. Da un pensatore cum’è Pasquale Paoli, ch’hà fattu anch’ellu i so sbaglii è ch’hè statu ublicatu di cumpone cù u so tempu, ma ch’hà scrittu à u Panteone di a Stòria corsa valori d’umanìsimu, di sulidarità, di ghjustizia è di fede in l’avvene per ssu pòpulu. E so prudezze fèrmanu stampate per sempre, per vìa di i valori ch’ellu hà difesu cù i so cumpagni di lotta.
U naziunalìsimu, eri, oghje, dumane, mai, ùn pò scurdassi di ssi valori chì li anu datu nàscita. O senò more. A pulìtica ùn pò fà u bè, ùn pò sparghje prugressu pè a Corsica è pè i Corsi, indifora di ssi valori custì. Innò à u RN in Corsica ! Vutate dumènica è vutate sempre sempre contr’à ciò chì sputa nant’à ciò chè no simu. •