Dui anni fà, u 16 di sittembre 2022, era assassinata Mahsa Amini da u regime di i Mollah iraniani. Mahsa avìa tuttu contr’à ella per ss’assassini : donna, curda, u spìritu lìberu, l’intusiàsimu di a giuventù, ricusava d’esse imprigiunata ind’è u so capu. Hè stata arrestata u 13 di sittembre per vìa ch’ella ùn purtava micca u velu. Trè ghjorni dopu, allora chì i so parenti a circàvanu dapertuttu, si ne more in un cummissariatu, prubabilmente vìttima di i calci è pugni ricevuti… A pulizza religiosa s’hè difesa diciendu ch’ella era morta da una crisa cardiaca… À 22 anni, in piena salute… Nimu ùn ci hà credutu è fùria in fùria a nutizia è a rivolta si sò sparse. Mahsa hè diventata un sìmbulu di resistenza in u muvimentu ch’hà presu u nome di « Donna, vita, libertà ! »Dapoi, a ripressione hè stata dura, sò morti à centinaie e donne, l’omi chì l’appughjàvanu ind’è sta lotta, è ancu i zitelli, à le volte una palla in spinu, assassinati da a pulizza ripressiva durante e manifestazioni, suvente dinù turturati, o macuccati da fundamentalisti, è mondu torna sò stati imprigiunati, cundannati da prucessi speditivi. Perchè ? Perch’è ballàvanu e donne in pienu carrughju, capelli à u ventu, sfidendu a dittattura. Perch’è cantàvanu allora ch’ellu hè difesu dinù. Perch’è bramàvanu un antr’avvene di dignità, di pace, di ghjustizia, di libertà. Perch’è a so gioia, a so sede di libertà, fàcenu paura à sti mullizzi.
Oghje, dui anni dopu, cuntinuèghjanu a so lotta l’iraniani lìberi. Anu sfilatu in i carrughji di Téhéran, donne capelli sciolti, senza l’hijab maladettu chì li hè impostu. 22.000 personi secondu à l’ONU sò state imprigiunate dapoi ssu famosu 16 di sittembre 2022 è centinaie sò morti appressu à Mahsa. Puru, certe cose càmbianu… Massoud Pezeshkian, prisentatu cum’un riformatore, hè statu elettu à a presidenza iraniana, ancu sè a ripressione ferma tremenda. Per dì quant’ellu hè diffìciule d’oppònesi à u guidu supranu l’Ayatollah Khamenei à u putere dapoi 35 anni è chì cuncentreghja tutti i puteri, ghjudiziariu, pullizzeru, mediaticu, esecutivu… Ma a rivuluzione si face pian’pianinu in grazia à l’effettu di massa di tutta sta ghjente curagiosa. Sò straurdinarie e donne iraniane ! L’omi l’anu raghjunte è mai ùn si pudìa pensà di vede omi è donne à manifestà inseme in carrughju. « Malgratu a ripressione tremenda, e mentalità càmbianu » dice l’avucata Chirinne Ardakani. E donne in prigiò cuntinuèghjanu à rivendicà, cum’è Narges Mohammadi, premiu Nobele di a Pace, malgratu l’annate di prigiò in più… U regime si ghjova di l’intelligenza artificiala per truvà e donne senza hijab. A pulizza religiosa e caccighjeghja di manera accanita. « L’ubligazione di u velu hè una di e prime lege di u regime. S’ella sparisce, ghjè a Repùblica islamista chì si sfonda » dice Mona Tajali, specialista di sse quistioni. E studiente sò arrestate dinù, e viulenze è e minaccie sò cutidiane.
U mondu ùn parla micca abbastanza di e donne iraniane. S’elle èranu di più aiutate, sè a rivolta era mundiale, u putere di i Mollah sarebbe scuzzulatu… Ssu 16 di sittembre, in Afghanistanu, una mannata di donne anu manifestate di pettu à l’imbasciata iraniana in Kaboul… Quesse sì dinù chì sò curagiose !
Cù l’Afghanistanu, cù l’Iran, mughjemu ancu noi : « Donna, vita, libertà ! » •
