Sarina Esmailzadeh era una liceana di 16 anni, allegra è ingorda di vita, chì fecìa pìccule videò nant’à i retali suciale per dì a so gioia di campà, cusì bella è talentuosa giuventù… Hè stata assassinata u 21 di sittembre 2022 da a pullizza di i mollah iraniani, tichjata di colpi, u capu sfracellatu sott’à e battarchjate, dìcenu l’ONG Iran Humans Rights è Amnesty International. Sarina era andata à manifestà contr’à l’assassiniu di Mahsa Amini in Karaj, in u circondu di Téhéran. A pulizza hà dettu ch’ella s’hè lampata da per ella da u tettu d’un casale… quale a pò crede, ella chì rispirava a vita è ballava, è cantava diciendu qualchi settimana nanzu à a so morte nant’à e so videò : « Ùn ci hè più bellu sìntimu chè di sèntesi lìbera è allegerita ! » beata d’avè compiu i so esàmini è di pudè gode di a so giuventù…
Iran Humans Rights conta cume a so mamma l’hà truvata à a morga per l’identificazione di a so salma trè ghjorni dopu, cù numarose ferite nant’à u so visu è u craniu scrazatu da a forza di e matracche.
Sarina avìa 3000 abbunati nant’à YouTube induv’ella cuntava u so umore cutidianu d’aduliscente. Sarina ascultendu mùsica. Sarina ballendu. Sarina cucinendu è manghjendu una pizza. Sarina parlendu capelli sciolti di pettu à a camerà. Sarina pilèndusi i sopraciglii. Sarina sunniendu à i viaghji ch’ella vulìa fà. Sarina parlendu di a so istatina… « Sò affuriata di fà une poche di cose, aghju da fà una lista di i libri chì voliu leghje, di i lochi chì voliu visità… » dicìa torna a giuvanotta di ghjugnu 2022.
Ma Sarina dinunziava dinù l’inghjustizie, spusendu e càuse di a libertà, cum’è quand’ella cantava Take me to church di u cantadore irlandese Hozier chì dinunzia l’umufubìa ind’è a ghjesgia cattòlica… È Sarina dinunziava u regime iranianu, e cundizioni gattive imposte nant’à u pianu ecunòmicu o culturale, è ben intesa, u disprezzu di e donne, « noi e donne ùn avemu micca u drittu di vede un macciu ind’è un stàdiu, puru ùn ci hè cosa più banale » dicìa u più sempliciamente di u mondu a zitellona. « Ci hè di più ristrizzioni pè e donne, cum’è l’ubligazione di purtà u hijab è mondu altre interdizzioni ch’ùn cuncèrnanu micca l’omi » si lagnava torna Sarina ch’ùn capìa micca sse difarenze. « Nunda ùn vale più chè a libertà » dicìa torna disciulendu nant’à l’inghjustizie, « ùn simu micca cum’è l’altre generazioni, vint’anni fà, ch’ùn sapìanu ciò ch’ella era a vita fora di l’Iranu »… Dopu à a so morte e manifestazioni si sò multiplicate in Iranu è a so fottò cù u so surisu splendurente hè stata pisata cù quella di Mahsa Amini è di tant’altre giuvanotte assassinate. A mamma di Sarina, ella, ùn hà pussutu suppurtà a morte di a so figliola è e pressioni di a pulizza da ch’ella ùn dinunzia micca l’assassiniu, cum’elli a fàcenu i mollah dapoi u principiu di a rivuluzione « Donna, Vita, Libertà ». Pressioni sin’à u so intarru induv’elli anu impeditu i s’amichi d’esse presenti è l’anu minacciatu ancu di pigliàssine à u so figliolu s’ella parlava. A corcia mamma s’hè impiccata di dulore…
« A mo pàtria mi dà u sìntimu d’esse in esiliu » dicìa torna Sarina. Vola o giuvanotta, vola sopr’à i nùvuli, u cielu hè a to pàtria ormai, è lìbera sì. •