Hè un associu natu in 2018, è cum’ellu dice bè u so nome, u so scopu hè di sparte a mùsica, u cantu, a risa, l’allegrìa ! In pochi anni, u fenòmenu Spartimusica s’hè sparsu in a cità bastiaccia. L’ùltima scumessa lampata : « sbundà u mercatu »… è cusì fù fatta, elevi, maestri, artisti da tutte e mamme, chjuchi è maiò, si sò dati appuntamenti l’11 di ghjugnu scorsu nant’à a piazza di u mercatu, 3000 personi in piazza è centinaie à prudùcesi nant’à a scena da sparghje u so talente è u s’amore di a mùsica è di u cantu corsu ! A vi dicu, hè un fenòmenu !
Spartimusica hà trovu agrottu in un anziana cantina induv’ellu si vendìanu i pesci tandu… di fronte à u mare è a calata di i martiri, daretu à u mercà, u locu oghje hè un agrottu pè a mùsica, u teatru, a cultura, a spartera… « Hà per scopu di ligà a ghjente cù a cultura » dice u situ spartimusica.com, u scopu prima di tuttu « hè d’insignà a musica » da « u tradiziunale sin’à a varietà, passendu pà corsi di DJ ». Òndeci prufessori diplumati o anziani studienti di grande scole di mùsica prupònenu ghitarra, bassa, cètera, viulinu, pianò, batterìa… S’impara u cantu, tradiziunale, lìricu o di varietà, è a tecnica vucale.
È ci hè ancu corsi per i ciucci cù un svegliu musicale tutti i sàbatu.
Spartimusica hà una sala di spettàculu chì prupone assai ripresentazioni ogni mese. « Per esempiu, tutti i marti sera, ci sò i “cabaret” fatti in cullaburazione cù a radiu RCFM. Tutti i primi sabbati di u mese, u comedy club colla annant’à a scena di Spartimusica per una ripresentazione dinù aperta à u pùblicu. D’altri evenementi sò spessi privisti, cum’è pezze di teatru o prisentazione d’album » da gruppi culturali chì mèttenu l’ambiente in tuttu u quartieru.
Spartimusica riceve mostre di pitture d’artisti, prisentazione di libri, è ghjè « un locu d’accoltu per tutti l’artisti chì anu bisognu. U scopu hè di risponde à una dumanda culturale in u rughjone bastiacciu. Parechji strumenti fèrmanu sempre sopra locu. Ghitarre, pianò, basse, viulinu, batterìe è ancu d’altri sò sempre dispunìvuli ! »
« U scopu maiò di l’associu ferma di fà di sta scola di mùsica una scola chì permette, à a fine, d’ottene un diplomu, sott’à a forma di grande scole di mùsica chì esìstenu dighjà annant’à u cuntinente. »
Sbundà u mercà !
Avìa fattu una prumessa… era una scummessa… è ghjè stata fatta : l’11 di ghjugnu scorsu, « Spartimusica ha sbundatu u mercà ! » 3.000 parsoni, 120 metriquadrati di scena, 320 elevi, 3 ore è vinti di cuncertu, un bellu appuntamentu per rende u travagliu accanitu di i prufessori, di l’elevi, di e famiglie. « Ssu cuncertu hè natu da l’assuciazione di quattru scemi chjamati AlCeDo. » Sò i quattu soci di Spartimusica, Paul è Olivia Cesari, Clemente Albertini è Michè Dominici. « Un prugettu purtatu da l’amore è a scimità » dìcenu ssi scemi di mùsica, « quandu a passione si tramanda, a magìa ci hè ! »
Era a quarta edizioni di a festa di a scola chì ricumpensa u travagliu di l’annata da sparghje è sparte tutta a passione chì porta ssa bella giuventù !
Spartimusica sà truvà l’aiutu. À u so latu musicanti è tècnichi prufessiunali, imprese partenarie, a cità di Bastia, quella di Biguglia, a Cullettività di Corsica, altre scole cum’è Arte è Sport di Jeanne d’Arc ecc. Hè una dimarchja magnìfica chì tramanda più chè a cultura, l’ànima corsa, a vera, quella di a mùsica è di u cantu spartuti cù gioia è passione.
Fin’tantu ch’elli camperanu prugetti cusì, a nostra cultura fermerà viva !
Sciaccammanate à tutti ! •
