U 15 di ghjugnu scorsu era a ghjurnata mundiale contr’à a fame. Stituita da l’Urganisazione di e Nazione Unite, u scopu hè di fà rinculà a fame in u mondu… invece, cresce ogni annu. I cunflitti, a misèria, u sottusviluppu, l’inugualità, fàcenu ch’ellu ferma sempre in 2025 zitelli, donne, omi, à pate a fame. Secondu à l’Unicef, u fondu mundiale per difende i dritti di i zitelli, 181 millioni di zitelli di menu di 5 anni pàtenu a fame, un zitellu nant’à quattru. 20 paesi còntanu 65% di i zitelli in situazione di puvertà alimentaria dice torna l’Unicef. In 2023, 733 millioni di personi suffrìanu a fame, una statìstica in custante aumentazione dapoi 10 anni. E crise ecunòmiche, e crise agrìcule, u riscaldimentu climàticu è u mancu d’acqua, sò frà e càuse e più impurtante, cù e guerre è i cunflitti. In Gasà, i zitelli mànghjanu un solu ripastu à u ghjornu, è a parulla « ripastu » hè sprupusitata… Certi ùn mànghjanu chè una volta tutti i dui o trè ghjorni. I cunflitti armati sò rispunsèvuli di più di a metà di e crise alimentàrie in u mondu. L’aiutu alimentàriu hè suvente impeditu o frinatu, cum’è in Gasà. L’Unicef stima à quasi un mezu millione a ghjente minacciata di more di fame in a banda di Gasà. « U rìsicu di famina ùn ghjunghje micca d’un colpu » dice a diretrice generale di l’Unicef, Catalina Russell, « si sviluppa in i lochi induve l’accessu à l’alimentazione hè impeditu, induve i sistemi di salute si sò sfundati è induve i zitelli sò privati di u mìnimu per sopravive. A fame è a malnutrizione acute sò una realità cutidiana pè i zitelli in a banda di Gasà. Avemu alertatu parechje volte contr’à st’evuluzione è chjamemu torna tutti i prutagunisti da impedisce a catastrofa ». I cumerci sò strutti o chjòdenu, mancu elli ùn tròvanu più robba da manghjà, e panatterìa chjòdenu, l’agricultura hè à l’abandonnu, mòvesi sottu à e bombe à mezu à e ruine per truvà un pocu di pane hè diffìciule, l’aiutu umanitariu ùn ghjunghje à entre o cù difficultà, ùn ci hè più acqua nè elettricità. Cumu fà bolle un pocu di brodu cù qualchi buchje di pomi senza acqua ?
« A situazione hè di più in più pèssima è u mancu d’aiutu è d’assistanza s’impeghjurisce di manera alarmante. E donne incinte o quelle chì danu à sughje sò minacciate di manera doppia, stanca da u fattu d’esse incinta o d’avè apparturitu, sò tocche dinù da a fame, è da privazioni cuntìnue di tutti i prudutti essenziali à a salute è à u nutrimentu » dice Azzione contr’à a Fame, un antra ONG presente in Gasà.
In i nostri paesi detti sviluppati, ghjè a misèria a càusa a più pisìa, disuccupazione, puvertà, fàcenu chì i zitelli ùn mànghjanu à a so fame, i so parenti ancu di menu… 50 % di i zitelli in situazione di puvertà alimentaria (ch’ùn mànghjanu micca à a so fame o male) risichèghjanu di cascà in fùria in fùria in situazione di malnutrizione. Sta malnutrizione vene da gattive abitùtine alimentàrie dinù. Troppu zùccheru, troppu grassu, troppu sale, micca abbastanza frutta è legumi, mancu d’alimenti nutrittivi, i zitelli di e nostre sucietà sò malnutriti, d’un latu, micca abbastanza da l’altru. In Corsica dinù. Un zitellu nant’à quattru campa in una famiglia pòvera, unu nant’à deci ind’una famiglia induve nimu ùn travaglia cù pocu è micca rivenuti, è un zitellu nant’à quattru salta un ripastu à u ghjornu.
U bisognu d’una ghjurnata mundiale contr’à a fame ci hè. •
