Un hè chè un annunziu di più nant’à i nostri posti di televisiò, trà un piattu è l’altru à meziornu, furtivu à mezu à u trabboccu di publicità, un ghjurnalista conta un drama di più in Gasà. Sfìlanu e stampe, trà ruine è sangue… Fin di maghju, duie attache spaventose frà tant’altre, fecìanu un carnaghju tremendu. Salme calcinate o smembrate di a zitellina annientata sott’à u fracassu di e bombe… Da una famiglia di 10 cinini di menu di 12 anni, solu unu gravamente feritu rispirava sempre… È s’ellu sopraviva, cumu hà da cresce ssu zitellu ? Cumu si pò custruì cu u ricordu di i so fratellucci è surelluccie assassinati ? Un pocu di più in là, ind’una scola in focu, un antr’attacca fecìa 31 morti, frà i quali 18 zitelli. Hè u cutidianu di Gasà. Secondu à l’Unicef omancu 50.000 zitelli sò stati tombi o feriti dapoi u 7 d’ottobre di u 2023. Quantu zitelluccie è zitellucci anu da more torna, per ghjunghje à scuzzulà e nostre cuscenze ?
È ùn mi parlate micca di ssi zitelli ghjudei marturiati anch’elli u 7 d’ottobre… Cusì bella giuventù annientita ind’è l’attrocità di ssa fruntiera di sangue trà ghjudei è palestiniani. E suffrenze di stu ghjornu è di i ghjorni dopu per l’ustagi, viulentate pè e donne, torturati, strappati à l’amore di i soi… Perchè un zitellu chì pienghje, ch’ellu sìa di n’importa chì locu, hè un zitellu chì pienghje. Perch’è un zitellu chì more à a punta di u vostru fucile hè un zitellu chì more. Cumu hè abuminèvule d’avè à sceglie trà duie innucenze. Cumu hè abuminèvule d’avè cum’è nemicu, e rise di a zitellina… Cusì cantava Barbara in ssu cantu Perlimpinpin chì pare à postu scrittu pè u drama di Gasà è d’Israele… Ùn parla micca di puesìa, scrasendu i fiori salvàtichi… è vede ghjucà a trasparenza in fondu d’una corte di muri grisgi induve l’alba ùn hà mai a so scenza…
Ùn ferma chè una suluzione à sta guerra imbecilla, atroce, spaventosa. Quella di u dirittu internaziunale rispettatu. Quella di u diàlogu chì face chì mondu ghjudei è palestiniani sanu parlassi è chede a pace. Perch’è ci n’hè è ci n’hè numarosi, chjamatu ancu i Ghandi palestiniani, o i Ghandi israeliani, capaci di parlassi, tènesi caru è sparghje amore, ghjustizia è pace, malgratu tutte e suffrenze ch’elli anu puru campatu anch’elli dapoi chjuchi, imprigiunati ind’è sta guerra.
Cumu ghjente, è frà elli, Corsi tenuti cari da i soi, babbu o mamma di famiglia, attenti à i so ciucci, pronti à tuttu da ch’elli pòssinu campà beati, cumu ponu pensà ch’ellu hè un scàndalu di dumandà listessa cosa per un ciucciu di Palestina ? I zitelli di Gasà sò cum’è i zitelli di u mondu sanu, sò cum’è i zitelli d’Israele. Anu bisognu d’esse prutetti, di pudè manghjà è beie, di pudè andà in scola, di pudè cresce in pace è in armunìa, di pudè campà a so cultura è sparte cù i so vicini senza dulore nè odiu nè disprezzu, nè tràmpalu nè fruntiere.
Per quale, quantu è perchè, contr’à quale, cumu, contr’à chè, n’avemu abbastanza di e vostre viulenze. D’induve venite, induve andate, quale site, chì Diu prigate, vi pregu di fà silenziu. Per quale, cumu, quandu è perchè, s’ellu ci vole assulutamente esse contr’à qualchisìa o qualcosa, sò pè u sole punente, in cim’à e culline diserte, sò pè e fureste prufonde…
Ùn parlà più di puesìa, ma lascià campà i fiori salvàtichi, è fà ghjucà a trasparenze, in fondu d’una corte di muri grisgi, induve l’alba averebbe infine a so scenza. •
