Fousseynou Cissé hè un eroe. Di fronte à un focu in u 18u circundariu pariginu, s’hè lanciatu senza undà à u succorsu d’una famiglia di sei personi, frà i quali dui ciucci è dui zitelli chjuchi. L’incendiu hà picciatu ssu 4 di lugliu ind’un appartamentu à u secondu pianu è s’hè sparsu in fùria in fùria sin’à u seièsimu pianu cù fumaccie tòssiche di più in più zeppe. A famiglia surpresa da u sinistru stava à a finestra pruvendu à rispirà. Quand’ellu hà vistu a mamma di famiglia cù i ciucci appicollu, Fousseynou hà francatu a finestra d’un appartamentu vicinu è s’hè suspesu in punta d’una curnice stretta stretta trà e duie finestre à u seièsimu pianu per chjappà unu per unu ssi cinini è mètteli in securità in l’appartamentu à cantu, cù l’aiutu d’un antru vicinu. « Ùn aghju micca riflettutu per pòrghjeli aiutu, ghjè l’instintu chì m’hà purtatu à falla, senza calculà s’ellu era periculosu per mè o nò. Hè u core chì ti dice ci vole andà. Ghjè dopu avè vistu e stampe nant’à i retali ch’aghju capitu chì pudiu ancu more è cascà da u seièsimu pianu » dice l’omu di 39 anni, agente di pullizzìa in un cullegiu. Rientrendu di u travagliu, hà vistu l’incèndiu, cù a ghjente ammansata in carrughju mughjendu o filmendu a catastrofa, senza sapè chì fà… Ùn si pudìa falà i scali per sta famiglia imprigiunata da e fiame è u fume. L’aria era suffuchente. Fousseynou hè cullatu da un antru purtone, in l’appartamentu di u vicinu è hè passatu pè a finestra, cù sott’à i pedi, decine di metri di viotu… « Sò i ciucci chì m’anu cunduttu à fà qualcosa… era una quistione di sopravivenza. Aghju tesu u mo bracciu è a donna m’hà datu u primu ciucciu, pò u secondu », dice torna Fousseynou chì hà scupertu dopu l’imàgine filmate da donne chì stanu in faccia. « U ciucciettu pudìa ancu cascami di e mani… ghjè una scimità, ne tremu tuttu » dice l’omu sempre spaventatu.
In grazia à Fousseynou nimu ùn hè statu feritu. Solu una decina di personi sò stati intossicati da a fumaccia. Fousseynou hà da riceve a medaglia d’onore pè u so curagiu è hè statu invitatu à a sfilata di u 14 di lugliu da u presidente di a Repùblica chì l’hà chjamatu per felicitalu. « N’aghju a pella gallina » hà dettu Fousseynou tuttu cummossu.
Da sapè chì Fousseynou gode d’un sèmplice tìtulu di su-
ghjornu…. è ùn pò micca avè un impiecu à a merìa di Parigi cum’ellu vulerìa. Ghjè cuntrattuale è quand’omu li dumanda ciò ch’ellu brama u più cum’è ricumpensa, palesa a so speranza di vede « a situazione sbluccassi… sè tu n’hai micca a naziunalità francese, ùn sì micca impiecatu » dice sempliciamente Fousseynou, maritatu è babbu d’un ciucciu di dui anni.
« Hà avutu un azzione forte assai, una vera azzione impegnata » hà cummentatu u culunellu di i spinghjifochi, Jean-Paul Bosland, « hè ciò ch’aspettemu, un impegnu citatinu. Digià dà l’alterta è pruvà dopu à fà un màssimu per evacuà a ghjente. »
Una bella stòria chì si finisce bè. Fousseynou hà avutu u riflessu di u babbu di famiglia à vede ssi ciucci assuffucà. Un riflessu umanu. Più chè a sfilarata di u 14 di lugliu à cantu à u presidente di a Repùblica, sarebbe bè di rigalali a pussibilità di stà in Francia cù un veru cuntrattu di travagliu. •
