Militente di a lingua, Carlu Castellani hè statu durante anni è anni una di e piume d’Arritti. Fundatore di Scola Corsa di Bastia in tempu di u Riacquistu, hà scrittu parechji libri, frà i quali sta Mémoire des Jours – Fatti è Detti. Usi, tradizioni, fatti, detti… Arritti ramenta quì qualchi sprichju di st’òpera volta annant’à a nostra cultura è a nostra stòria, ghjuvelli cù a lingua di l’ànima di u pòpulu corsu.
22 di ferraghju di u 1941, morte in Marseglia di César Campinchi, natu u 4 di maghju 1882 in Calcatoghju. Era statu elettu Cunsigliere generale di Bucugnà in 1928, deputatu da u 1932 à u 1941, ministru di a Marina di ghjugnu 1937 à ghjennaghju 1938, ministru di a Ghjustizia di ghjennaghju à marzu 1938, è ministru di a Marina militare d’aprile 1938 à ghjugnu 1940.
26 di ferraghju di u 1763, una zecca hè stallatu in Muratu.
A Corsica di Paoli pichja munetta à pàrtesi di u 30 d’aprile.
In 1767 a zecca hè trasferita in Corti. Argente è ramu sò cullettati da u cleru da pudè pichja i soldi. Furcine, cuchjare, ghjuvelli sò strutti cù robbe di ghjesgia.
A munetta hè ritirata di a circulazione dopu à a disfatta di Ponte Novu.
27 di ferraghju di u 1967, a selezzione corsa di futbolu vince a squadra di Francia 2 à 0.
Si ne parla ancu avà.
29 di ferraghju. Hè San Cassian. Stu santu era ghjelosu di San Niculà, dice Carlu Castellani. Per punìscelu, Dìu creò l’annata bissestile è u santu ùn fù festighjatu chè tutti i quattru anni. Cusì, per parlà d’una data alluntanata, i Bastiacci ùsanu di sta spressione : « Eh ! Ghjunghjerà l’annu di San Cazzian ! »
29 di ferraghju 1767. A fluttiglia di Paoli si lancia à a cunquista di Capraia. I Corsi vìncenu dopu à trè mesi d’assediu.
Carlu Castellani ci ramenta detti nant’à u mese di ferraghju :
– Ferraghju ferraghjettu, cortu è maladettu.
– Ciriola s’ellu face bellu tempu di l’invernu simu nentru, s’ellu face granaghjola, di l’invernu simu fora. S’ellu hè sole o bellu tempu di l’invernu n’avemu ancu.
– S’è ferraghju ùn fussi frà i mesi ùn ci sarebbe misèria in i paesi.
– Ferraghju fretu è ventu ancu in lettu.
– A Candilara l’inveru pripara. Per un nulu di ferraghju ùn lascia di fà u to viaghju.
1u di marzu di u 1857, nasce in Bastia Sebastiano d’Alzeto, autore di parechji rumanzi frà i quali u famosu Pesciu Anguilla in lingua corsa.
More u 3 di dicembre di u 1963. Riposa in Ville di Petrabugnu.
2 di marzu di u 1882, nasce in Bastia u pittore Antoine Baffico ch’hà rializatu numarose òpere frà e quale pitture ch’òrnanu a ghjesgia di Borgu è u Teatru di Bastia. •
