30 morti frà l’operatori è i spendifochi, ferma sempre u contu ufficiale di u cumitatu scientìficu di l’ONU pè a catastrofa di Cernobile. Vale à dì assai menu chì u contu di i guverni ucraìniani o bielorùssii à l’èpica di u soviettìsimu… invece sò millioni di vìttime in u mondu. Ma sè e nazioni sò state capace d’adunìscesi per dà soldi è custruisce dui sarcufagi… ùn sò state ancu capace d’adunìscesi per dà un contu ufficiale di e vìttime di a peghja catastrofa nuclearia in a stòria di l’umanità.
12 milliardi di bequerele… eccu, 40 anni dopu à a catastrofa, a radiuattività liberata à u mumentu di l’accidente di Cernobile palisata da l’Autorità di Sicurità Nuclearia è di Radiuprutezzione in Francia (ASNR). Vale à dì « 30.000 volte di più chè l’inseme di i righjetti radiuattivi sputati da e stallazioni nuclearie in u mondu » dice in u raportu l’ASNR. « Cernobile hè stata 20 anni di polèmica, ma simu ghjunti à cartugrafie è valori più precise chì s’avvicìnenu di e misure di l’associ » hà dettu unu di i so rispunsèvule attuale, Philippe Renaud, chì parla d’una quindecina di radiuelementi da u plutonium à u strontium, passendu pè u baryum sparsi in a natura. Solu l’iode 131, u cesium 134, u cesium 137 sò ghjunte sin’à in Francia dice torna l’ASNR (si scorda di qualchi altru elementi presenti sempre in Corsica, cum’è u strontium). Palesa l’ASNR chì sin’à 2007 l’affare era talamente delicata chì e so squadre si sò cuntentate di dà « indicazioni nant’à valori màssime di u territoriu senza mai indità i lochi precisi »…. Umbeh ! « L’Autorità » palesa quantunque ch’ellu ci vulia tandu piglià in contu l’abtùdine di vita di e populazione cum’è in Corsica… ciò ch’ùn hè statu fattu. È dumane ? S’ella accade un antra catastrofa, chì seranu e misure prese da « l’autorità » ?
7,7 di magnitùdine, un putente terramotu hà scuzzulatu u Giappone stu 20 d’aprile à Iwate (costa Ueste). L’alerta à u tsunamì hè stata lampata è l’onda era di menu d’un metru. Ma si teme un antru terramotu più forte… U paese hè sempre traumatizatu da u terramotu accadutu di marzu 2011, di magnitùdine 9 nant’à a scala di Richter. Avia fattu più di 20.000 morti, un mezu millione di spiazzati, è pruvucatu un perìculu nucleariu à a centrala di Fukushima.
15 anni dopu, a cità ferma diserta è interdetta. A regione ùn hè ancu pronta à accoglie a vita è ferma un travagliu tremendu per squassà u disastru. In quantu à e vìttime di u nucleariu, si ne parla pocu. U guvernu palesa 2.300 morti detti « indiretti », vale à dì morti d’una malatìa o d’un càncaru pruvucatu da a radiuattività, o di u ciambuttamentu impostu in a vita di a ghjente (suicìdii o chì si sò lasciati more). U nucleariu ùn tomba solu di a radiuattività. U museu di u disastru à Fukushima conta a stòria di tutte ste suffrenze.
Altru capatoghju menu d’un gramma nant’à 880 tunnellate di corium hà pussutu esse ricuperatu soprapiazza… è ùn si sò ancu cumu trattà sta pulluzione. 14 millioni di metri cubi di terra arraspata ferma dinù sopralocu… più di 650.000 bestiami sò stati tombi dopu à a catastrofa è stese immense induv’omu cultivava nanzu u risu fèrmanu abbandunate… Nimu ùn parla di stu bilanciu tremendu. Què dinù hè u prezzu di u nucleariu. •
