Scola Corsa hà chjamatu à adunìscesi in Bastia è in Aiacciu stu 28 d’aprile per dumandà a « cuntrattualisazione generalizata, vale à dì a presa in càrica di e paghe di 11 insignanti da u Statu… sola manera di perennisà u retale Scola Corsa ». A Federazione ramenta dinù chì l’aiutu di a Cullettività di Corsica hè statu « vutatu à l’unanimità di i gruppi pulìtichi dapoi cinque anni » è chì « tutti i retali di e scole private immersive di l’altre regioni sò finanzati nant’à u stessu modu di 2/3 di suvvenzioni pùbliche. Dichjarà illegale a suvvenzione hè, di fatti, ipotecà l’avvena di Scola Corsa ». È forse quellu dumane di tutte e scole d’insignamentu immersivu in Francia ?
Più d’una millaia di personi si sò mubilizati daretu à i cinnini da ch’ella campi Scola Corsa.
Mughji, canti, panelli culuriti per dì a gioia di parlà è di campà in lingua corsa, a mubilisazione hà accolta trà 1.000 è 1.500 personi trà Aiacciu è Bastia.
Delegazioni sò state ricevute in e duie cità per dibatte inseme in visiocunferenza. I membri di Scola Corsa èranu accumpagnati da l’eletti per testimugnà di u sustegnu di tutte l’istituzioni è di tutte e famiglie pulìtiche. À a surtita di sta riunione, u presidente Ghjiseppu Turchini hà fattu sapè chì i dui prefetti invitàvanu in a settimana à mèttesi in giru à un tavulinu per parlà di e cunsequenze di a prucedura prefetturale ingagiata ch’ùn pò esse piantata, ma sopratuttu di parlà di l’11 posti à cuntrattualizà da pudè finanzà u funziunamentu di ste scole cum’ella hè prevista ind’è a lege. « Avemu cuminciatu à intravede une poche di suluzioni ghjurìdiche, cuntàbile, ma ùn ci hè ancu nunda di cuncretu… tuttu si ghjoca in Parigi, vi dumandemu di stà mubilizati » hà dettu u presidente.
U deputatu Michè Castellani s’hè ingagiatu à cullà neguzià in Parigi. « U messagiu serà fattu per falli capì chì ci vole à sbluccà sta situazione. Ci vole à esce d’un pusiziunamentu amministrativu per entre ind’una risposta di natura pulìtica » hà dettu u deputatu cismuntincu.
« I prefetti anu pigliatu a misura di a mubilisazione » hà dettu per contu soiu Gilles Simeoni, merre di Bastia è incaricatu di lingua corsa à a Culletività di Corsica. « E risposte chè no aspettemu sò à mezu è à longu andà. Ci vole una discussione pulìtica è ghjurìdica di fondu per assicurà u passu per Scola Corsa. Passa per una revisione custituziunale ma averemu l’occasione di parlanne. U prublema oghje ghjè l’urgenza, u cortu andà. Sè ùn avemu micca l’11 posti ch’anu da permette à Scola Corsa di mantene a so attività, Scola Corsa hà da sparisce. Avemu postu u prublema in tèrmini di vita o di morte… Ci hè una cuntradizione maiò pè u Statu d’avè decisu a cuntrattualisazione, dunque avè ricunnisciutu a qualità pedagògia di a dimarchja di Scola Corsa, è d’ùn dalli micca i mezi di campà. Oghje chì ghjè oghje, ghjè a Cullettività di Corsica à traversu una cunvenzione à Scola Corsa chì permette à Scola Corsa di campà è di sviluppassi… Simu pronti à tutte e riunione ch’elli vòlinu, ma ùn si pò micca parlà à mez’andà è à longu andà, senza regulà u cort’andà è l’urgenza, vale à dì finanzà l’11 posti ».
Ammentemu chì ssa cuntratualisazione hè di drittu. Di fatti, dapoi a lege Debré in 1959, u Statu cuntrattualizeghja cù e scole private chì a dumàndanu. Accunsenta cusì un sustegnu cù a presa in càrica di e paghe di l’insignanti di sse scole, da chì i zitelli accolti pòssinu benefizià di una qualità d’insignamentu para à quella di l’insignamentu pùblicu. In iscambiu, sò cusì cuntrullate sse scole da l’ispezzione acadèmica. Ssu cuntrattu era statu previstu tandu per l’insignamentu cunfessiunale (scole catòliche o prutestante). Ci anu benefiziatu di lògica e scole assuciative d’insignamentu immersivu à pàrtesi di u 1994. Oghje, cù u ricusu di fà benefizia a lingua corsa di ssu « cuntrattu », peghju, d’impedisce a Cullettività di Corsica di parà e mancanze di u Statu, mette in perìculu sse scole vìttime d’una discriminazione criminale.
A lege Debré avia integratu u Còdice di l’Educazione in 2000, ghjè dì sè u Statu sprezza quì e so pròpie règule !
Oghje cù 200 zitelli in scola, 280 à a pròssima rientrata, sò centinaie di parenti, babboni è mammone, zie è zii, à mubilizassi cù e maestre è i militanti di Scola Corsa. « Tutta a sucietà corsa hè daretu à Scola Corsa » hà dettu Gilles Simeoni. Ci vole à cuntinuà a mubilisazione è ottene ciò ch’hè di drittu.
In u listessu tempu, u « manifestu » sparsu da 182 capi d’impresa corsi à tutte l’imprese, ma dinù à e stituzioni, l’eletti, i citatini chì a vòlenu, hà un grossu successu anch’ellu, è cuntava à u mumentu di stampà stu ghjurnale qualchi 7.000 zifre !
Voi dinù zifràtelu è fàtelu zifrà ! Scola Corsa deve campà, perchè a nostra lingua deve campà ! •
