Shigeaki Mori avia 8 anni u 6 d’aostu di u 1945. Natu in u circondu di Hiroshima, si truvava à 2,5 chilòmetri d’induv’ella hà schiattata a bomba. Toccu da u soffiu atòmicu spaventosu, hè statu spallucatu d’un ponte sin’à u guadellu di sottu. « Mi sò truvatu sott’à u fungu di nùvulu è aghju decisu di stà ind’u fiume un mumentu… pò sò surtitu branculendu è aghju vistu una donna chì trampalava, piena di sangue, tinendu cù e so mani e so cive chì spendicàvanu… m’hà dumandatu induv’ellu ci era un ospidale. Sò scappatu pienghjendu è lachèndula sola… » cuntava qualchi annu fà Shigeaki Mori. Era un cinninu, ospidale ùn ci n’era più, ùn ci era più nunda. Shigeaki hà tenutu in mente tutta a so vita e salme brusgiate ch’ellu ci vulia calpighjà, l’addisperu di i sopraviventi, e suffrenze, i mughji, i lagni… Fughjia… Cum’hè ch’ellu si n’hè surtitu ? Forse hè per quessa ch’ellu hà cunsacratu dopu a so vita à a ricerca da testimugnà di l’assurdità di a guerra. Cusì hà buscatu un ghjornu una lista di dòdeci nomi d’aviatori imprigiunati à a fin’di lùgliu 1945, membri di dui bumbardieri abbattuti nant’à a basa navale di Kure. U Lonesome Lady è u Taloa. Imprigiunati in Hiroshima, à 400 metri di l’epicentru di a bomba, sò morti cum’è i 140.000 giappunesi ind’è l’infernu di Little Boy1… tumbati da u so pròpiu paese… È e so famiglie ùn ne sapìanu nunda, èranu dichjarati smariti, morti presunti. U guvernu americanu li dispiacia à palisà ch’elli èranu stati tombi da a bomba atòmica americana. Mori s’hè messu à circà, senza sustegnu stituziunale, senza soldi, fora di u so tempu di travagliu, hà sbulicatu l’archivi, ritruvatu testimogni, ricustituitu l’identità di st’omi, u so parcorsu, u locu induv’elli sò stati chjappi, l’òrdine di trasferimentu, l’interrugatorii… Ci hà messu 40 anni per rinvivisce ssa stòria smenticata da tutti. Eppò s’hè messu à scrive à ogni famiglia à traversu parechje cità di i Stati Uniti. Lèttere ghjunte 70 anni dopu a sparizione di si suldati smariti… Mori li hà spiecatu a so morte, mandènduli documenti, fottografie à le volte. In 2008, hà publicatu un libru : The secrete of the American POWs Killed by the Atomic Bomb, u secretu di i prigiuneri di guerra americani tombi da a bomba atòmica.
U libru hà avutu u prèmiu Kikuchi Kan, u più prestigiosu premiu culturale à u Giappone, rivelendu a verità nant’à ssa stòria tràgica. Un filmu documentàriu, Paper Lanterns rializatu da u sineaste americanu Barry Frechette, conta a stòria di a ricerca di Mori.
Di maghju 2016, quandu Barack Obama hè ghjuntu arricògliesi di fronte à u Memorial di a Pace d’Hiroshima, era u primu presidente americanu à visità a cità martòriu. Mori ci era. I dui omi si sò scuntrati è abbracciati. Una stampa ch’hà fattu u giru di u mondu è hè diventata stòria anch’ella, cum’è quellu manu à manu trà Mitterrand è Kohl in u 1984 simbulizendu a ricunciliazione trà a Francia è l’Allemagna.
Irunia di a stòria, Shigeaki Mori, ssu zitellucciu d’8 anni vìttima di a bomba Little Boy (zitellettu), hà cunsacratu a so vita à a ricunniscenza d’un martoriu mezu à u martòriu di u so
pòpulu. Quellu di 12 aviatori americani ch’avìanu puru anch’elli bumbardati u Giappone.
S’hè mortu u 14 di marzu scorsu à l’età d’88 anni quellu ch’avia spiecatu e so mutivazioni cusì : « Ùn aghju micca fattu 40 anni di ricerca nant’à ghjente d’un paese nemicu, ma nant’à èssere umani. » •
- Nome datu à a bomba… ↩︎
