Omu pò imaginà un paese senza donna ? Un paese induve ùn si vèdenu chè omi in carrughju, in i magazini, in e stituzioni, à u travagliu, in e scole. Un paese induve a donna hè sguassata ? Esiste, è si chjama l’Afghanistanu. Sò 28 millioni di donne chjose in casa, piatte, da ùn mustrà à nimu, murtulone… Interdette di stùdii, interdette di cultura, interdette di travaglìa, interdette di parlà, interdette di pruminate è di spàzii pùblichi, interdette di viaghjà, interdette d’esce fora sola, ancu nant’à u sogliu di a porta, interdette di gioia, interdette di culori, interdette di visu… Ùn si pò imaginà a viulenza ch’ella raprisenta à u cutidianu è in a vita di e donne sse cundizioni d’affocu è di trènacu. Nanzu à ch’elli vòltinu à u putere i talibani, campàvanu sse donne, ùn era divizia in un paese pòveru, è tutte ùn èranu capace di u megliu, ma èranu lìbere, o sempliciamente visìbile. Certe ancu èranu duttore, ingeniore, insignante, e zitelle andàvanu à scole, e giòvane andàvanu à l’università, l’altre facìanu u passa è vene per appruntà a ghjurnata, avìanu una piazza ind’è a sucietà, chjachjeràvanu quand’elle si scuntràvanu, pudìanu pusà nant’à i banchi pùblichi, cantàvanu à le volte, ballàvanu, avìanu sonnii, tutte l’andature è e brame d’un cutidianu nurmale. Malgratu e prumesse di i talibani à a cumunità internaziunale, u so avvene s’hè abbrunitu prugressivamente. È oghje, avvene ùn ci n’hè più.
Eppuru fèrmanu resistente. S’urganizèghjanu per studià, s’adunìscenu per travaglià, cosgie, curassi, pitturassi ochji è lapre per fassi bella trà d’elle è sèntesi donne. S’addunìscenu per leghje, parlà, riflette… piattèndusi, in secretu. À le volte ghjùnghjenu à avè qualchi autorisazione, pachendu certi talibani o ghjùnghjenu à ch’elli chjòdinu l’ochji… Certe torna pròvanu à fughje, truvà in l’esiliu un succorsu, ma i paesi fruntieri sò u Pachistanu à u sud este è l’Iranu à l’ueste, u turcmenistanu, l’usbechistanu è u tadgichistanu à u nordu… ghjè dì quantu u viaghju hè una perspettiva tremenda anch’ellu, parte sola senza esse accumpagnate d’un omu ùn hè pussìbule è lascià i zitelli ùn vòlenu. Sò senza vita, senza avvene. Prigiunere. I matrimonii cù zitellette sò stati autorizate à pàrtesi di 9 anni, e donne sò viulentate senza mezu di purtà lagnanza.
Certe anu avutu un curagiu tremendu à manifestà quandu i talibani sò ghjunti à u putere, rivendichendu u drittu di cuntinuà à studià è à travaglià. E più anziane ch’avìanu cunnisciutu u primu putere talibanu èranu struite di ssa sperienza spaventosa. Ùn si sò micca sbagliate, disgraziosamente. Dopu à e prumesse, i talibani anu impostu u so regime senza donne d’un islamu intulerante è chjosu, induve l’omi càmpanu anch’elli cù a paura in corpu. Certi, ch’elli sìanu parenti, figliolu o maritu, ùn appròvanu è si lamèntanu di a sorte fatta à e so mamme, moglie, surelle… Si parla quì d’un paese pòveru, induve a curruzzione talibana si mantene da u terrore ch’elli spàrghjenu cù a so pulizza di a murale è l’omi in arma dapertuttu in carrughju induve omu pò esse cundannatu à a morte per un sguardu di traversu. A cumunità internaziunale ? Decide sanzioni ghjè affucà torna ssu pòpulu è aiutà un regime chì brama ghjust’à puntu di chjòdesi à u mondu.
U salutu venerà da l’internu. Ci tocca à aiutà l’afghani esiliati, permètteli di truvà asiliu è d’urganizà una resistenza. Invece, si stima à omancu dui millioni l’afghani rinviati in Afghanistanu dapoi u 2023, frà i quali donne è zitelle… •
