Scola Corsa hè a federazione di e scole assuciative d’insignamentu immersivu in lingua corsa. Si custruisce annant’à u mudellu digià messu in ballu da Seaska in Paese Bascu, o da Diwan in Brittania, Bressola in Catalunia, Calendreta in Occitania, ABCDM in Alsazia. Oghje sse scole còntanu più di 15.000 elevi. Benefizièghjanu di ciò ch’omu chjama a cuntrattualisazione, vale à dì ghjè u Statu chì paca l’insignanti in iscambiu d’assicurà un insignamentu pedagògicu làicu è di qualità pè i zitelli. Ùn hè un rigalu parte di u Statu. Hè di drittu. Ssu duvere hè statu decisu da a lege Debré aduprata in u 1959 da ùn discriminà e scole private cunfessiunale per raportu à e scole pùbliche. Dapoi tandu, e scole private vèdenu u Statu assicurà e paghe di i so maestri.
In Corsica nò. A cuntrattualisazione ùn hè assicurata. U Statu hà cuntrattualizatu cinque insignanti, micca di più (u bisognu quist’annu hè di 11). Vale à dì, sse scole ùn puderanu chè chjode s’ella cuntinueghja cusì. A Cullettività di Corsica hà allora cumpensatu sta mancanza di u Statu dendu una suvvenzione à Scola Corsa chì li permette di parà un tempu sta difficultà.
Ma u prefettu (dunque u Statu) hà postu lagnanza contr’à sta suvvenzione è a Cullettività ùn hà più u drittu di cuntinuà à parà u mancu di Statu. Micca suvvenzione, micca cuntrattualisazione, vale à dì u Statu cundanneghja à a morte e scole è i so cinini !
Ammentemu… E duie prime scole sò state apperte in 2021, Biguglia eppò Bastia. Una terza Scola, Sàrula Carcupinu, hà apertu in 2022. Una quarta, Corti, in 2023 è una quinta, Lucciana, annu scorsu. Ogni annu, sse scole àprenu una classa di più da chì i zitelli crèscinu di livellu. Ogni annu, ci hè dinù u bisognu d’apre d’altre scole, da chì i zitelli ch’anu principiatu in 2021 pòssinu, quand’ellu serà tempu, entre à u cullegiu Scola Corsa chì duverà apre anch’ellu…
Hè cusì chì sse scole crèscenu è custruìscenu i bislingui di dumane. Sin’à avà, u bilanciu hè pròpiu pusitivu. L’elevi fàcenu prugressi maiò, i parenti si sò impegnati in u funziunamentu di a so scola, incantati da a qualità di l’insignamentu, e maestre è l’aiute materne fàcenu un travaglione, intervenenti è animatori quasi cutidiani cumplètanu l’insignamentu di manera à sparghje a lingua corsa à tutti i livelli di u perisculare.
E cinque scole còntanu oghje più di duie centu zitelli scritti. Saranu più di 250 à a pròssima rientrata. Hà apertu u livellu elementariu.
I zitelli fàcenu surtite induve non solatimente cuntinuèghjanu à amparà a lingua, ma si custruìscenu i ricordi ch’infòrzanu a so ànima corsa, imparendu a cultura, l’agricultura, i lochi, l’animali… anu coltu e castagne in Castagniccia, ampàranu à cucinà, visìtanu paesi è cità, càntanu, ghjòcanu, sì spànnanu in a gioia di a so zitellina sprimèndula in lingua corsa. Scola Corsa hè salvatrice di l’identità corsa.
Cuntribuìscenu e cumune ch’accòglianu e scole, cuntribueghja a Cullettività di Corsica, cuntribuìscenu mondu intraprese, è mondu donatori. Hè cusì chì ssi zitelli chì saranu da quì à qualchi annu a prima generazione tutalmente bislingua ch’escerà di scola, sò u fruttu d’un operata maiò è bellìssima à u senu d’un pòpulu corsu chì s’hè presu in manu.
Scola Corsa conta dinù 35 impiegati (maestre, aiute materne, squatra amministrativa). Tutta sta dimarchja magnìfica hè una custruzzione pròpia nustrale. Ne pudemu esse fieri cullettivamente, nata da u pòpulu è pè u pòpulu !
Ma da ch’ella franchi l’intràppule ch’ellu mette u Statu ricusènduci a cuntrattualisazione generalizata, Scola Corsa hà bisognu di noi altri tutti. Fate u donu, ancu puru chjucu, sò i fiumicelli chì fàcenu i fiumoni ! Date è sparghjite intornu à voi a dumanda. Da ch’ella campi a lingua corsa ! •
