Stu 20 di lugliu 2026, Stèfanu Rabazzani hè partutu à l’altru mondu à l’età di 50 anni, lasciendu adduluriti i soi, parenti è amichi. È ssu dulore fù cusì tamantu, chì a so mamma, Laudànghjula Rabazzani, nata Maestracci, ùn hà pussutu assiste à u s’intarru, è hà vulsutu accumpagnalu u 22 di lugliu. Si nè sò cusì andati inseme apperlamanu ver di u Paradisu chè no bramemu tutti. Paria predestinatu ssu nome, Ànghjula laudata : fede è forza, ci nè vole à sta famiglia scuzzulata da e prove di a vita…
Stèfanu hà scumbattutu contr’à una malatitaccia senza mai lagnassi, fidu à sè stessu, omu ùmile è drittu, generosu è impegnatu pè a so terra è u so pòpulu, da giòvanu giòvanu in u sindicalìsimu studientinu è in tuttu e lotte patriotte postu chì zitellone avia già raghjuntu l’Unione di u Pòpulu Corsu à scumbatte per l’autunumia di a Corsica, pò più tardi s’hè impegnatu à u latu di a zitellina, cum’è prufessore di corsu, militente ch’ellu era di a nostra lingua. Arradicatu à a nostra terra, appassiunatu di u Sporting, hà sempre avutu un ingagiamentu lìberu sparghjendu amore è sincerità pè i soi.
A so presenza, u so surisu sempre in bocca, e so riflessioni stuzzicaghjole è astute, ci mancheranu assai.
Laudànghjula avia 81 anni. Era a moglie di u nostu amicu Ghjiseppu Maria Rabazzani (chì tutt’ognunu chjama Antò), è Stèfanu, era u so figliolu. Antone, militente instanchèvule di a nostra lingua è cusì bravu omu, prufundamente cridente, tene un curagiu è una dignità chì fòrzanu u rispettu. Arritti li manda basgi affettuosi, dinù à Mariana Croce, a cumpagna di Stèfanu è u so figliolu Battistu Agostini-Croce, è ben intesa à Antone (chì porta u stessu cugnome chè u so babbu), figliolu di Laudànghjula, è fratellu di Stèfanu, a so moglie è i so figlioli Lèsia è Ghjuvan’Filippu, nipoti è figliulini di i defunti, è à tutti i parenti è l’amichi adduluriti.
Avèdeci o Stè, avèdeci Laudànghjula, ripusate in a santa pace di u Signore. •
