Da u 18 è u 23 di sittembre scorsu era a settimana aurupea di a mubilità. Face 15 anni ch’ella hè stata lanciata da a cummissaria aurupea in càrica di l’ambiente di l’èpica, Margot Wallström. U scopu hè di sensibilizà u pùblicu, prumove a mubilità, prutege l’ambiente, sparghje pràtiche più pulite. Infurmà a ghjente è cunvìncela à l’utilisazione di i trasporti pùblichi è di u velò, a marchja, è tutti i mezi dolce per mòvesi. Cusì l’Auropa cunsacreghja una settimana sana da fà cunnosce e so pulìtiche, è truvà mezu di spàrghjele. Hè un mumentu forte di riflessione è di sensibilisazione di tutte e culllettività chì vanu à l’incontru di u pùblicu.
Quist’annu u tema di a settimana era l’ecu cundutta. Da sapè chì i nostri cumpurtamenti rispunsèvuli ponu cambià e cose. Simu assai dipendenti di i prudutti petrulieri. Sò più di dui millioni i gasi à effettu di serra ch’ella sputa a Corsica ogni annu. 45% vènenu da i trasporti. È una bella parte di ssa pulluzione vene da a strada ! Puru si pò misurà in furia i risultati d’una pulìtica vuluntarista. Un sèmplice stagiu d’ecu cundutta permette d’ecunumizà sin’à 20% di cunsumazione in essenza per un autumubilista. Vale à dì riduce e spese d’essenza, à tempu ch’ellu si riduce a pulluzione è dunque migliura u quadru di vita di tutti. Dinù, i trasporti in cumunu permèttanu di cunsumà trè volta di menu ch’una vittura. È quand’elli sò bus ibridi o à gasu, a perfurmanza hè multiplicata ben intesa. Di lugliu, aghju prisentatu un raportu à l’Assemblea di Corsica nant’à a covitturera. U sèmplice fattu di lacà una vittura per gruppassi ind’un antra permette di fà ecunumìe impurtante. Aumentà solu da 1,26 persona à 1,9 u trasportu in vittura, permette d’ecunumizà 16% di spese energètiche pè a Corsica ! A Cullettività Territuriale dinù prumove l’adopru di a bissicletta, dendu una prima di 500 euri per quale si compra una bissicletta d’assistenza elèttrica. In u 2016, 300 persone sò cusì state aiutate da l’AUE, l’Agenzia di l’Urbanìsimu è l’Energìa, vale à dì chì sò 25.000 litri d’essenza chì sò stati risparmiati ! Vale à dì torna 80.000 tunnellate d’emissioni di gasu à effettu di serra ch’ùn sò micca stati mandati in a natura. Viaghjà à pedi o à bissicletta hè un prò pè a salute, migliureghja u nostru quadru di vita, è face prò ancu à i nostri purtamuneti chì sò 340 auri l’ecunumìe mensile rializate per raportu à l’utilisazione di a vittura nant’à i nostri parcorsi cutidiani, cum’è d’andà à u travagliu tutte e matine. Si capisce chì l’inghjochi sò tamanti. L’impattu di a pulluzione stradale nant’à a salute di e pupulazioni raprisenta parechje decine di milliardi d’auri ogni annu pè i paesi di l’Unione Aurupea ! Ci vole à prupone alternative à a ghjente, da operà in furia ssa rivuluzione ind’è e nostre manere di mòvesi. Hè pussìbule. Basta à vulè.
Fabiana Giovannini.
