2.977 sò e vìttime di i terruristi d’Al Quaida l’11 di sittembre 2001. 25 anni fà, dui aviò sviati ciuttàvanu in e torre di u World Trad Center in New York, à tempu chì un antru aviò si scrasava nant’à u Pentagone. Un quartu aviò ùn tuccherà a so cìbula, i passageri di u volu 93 à curente di ciò chì si passava in New York è Washington, pruvaranu curagiosi à ripiglià u cuntrollu di l’aviò, ma disgraziosamente ùn ci sò ghjunti è l’aviò s’hè scrasatu in un campu di Pensilvania invece prubabilmente di u Capitole. Anu salvatu cusì centinaie d’altre vite. È u disastru ùn si pianta quì. Trà 9.000 à 10.000 personi sò morte di e sèguite di l’attentati, pulizzeri, spendifochi, agenti di pulizia, abitanti di Manhattan, sposti à e fumaccie è e pòlvere tòssiche di u sfundamentu di e torre. Si conta più di 57.000 casi di càncari in sèguita à l’attentati. È u bilanciu ùn hè chjosu. S’aspetta torna millaie d’altri càncari per via di e tossine rispirate o ingullite quellu ghjornu maladettu. Un scàndalu sanitariu per via chì l’autorità, da pudè riapre a Borsa, avìanu dettu ch’ùn ci era rìsichi à rispirà stu nùvulu carcu frà altru di tigliu, piombu, mercoriu…
2 ghjorni, hè l’età di a criatura truvata cù a so mamma nant’à un battellacciu in cor’di Mediterràniu… cù ella sò cusì 78 migranti chì sò stati salvati da l’Ocean Viking, u battellu armatu per luttà contr’à i boat people è permette à ssa ghjentarella di truvà un asiliu dopu à tante sciagure. À bordu ci èranu dinù dòdeci donne è parechji zitelli, frà i quali un ciucciu di 5 mesi è sta criaturella dunque, quasi nata in mare… « simu stuppiti da i rìsichi chì sta ghjente hè pronta à piglià per fughje a Libbia. Ammiremu a so resilienza. Ogni operazione di salvezza conta e so brame è a so determinazione à custruìscesi una vita da offre à i so zitelli un avvene senza paura. Cuntinueremu à esse quì da pòrghjeli succorsu di fronte à i perìculi »… dice a squadra di SOS Méditerranée (https://sosmediterranee.fr/)
7.400 morti, omancu ! È quantu malati in più ? A sicchina hè stata tremenda in Francia quist’annu è u custatu oghje hè fattu : u climà tomba. 100.000 èttari di spazii naturali è fureste sò stati dinù strutti è sò centinaie di milla a ghjente ch’hè stata tocca da i prublemi climàtichi in Francia. U ciambuttamentu climàticu arruine numarose vite. Ma di sta ghjente, si ne parla pocu è ssi ciambuttamenti ùn fàcenu chè cresce.
9 punti nant’à 9 fora di casa, ma 0 punti nant’à 9 in casa… u Sporting Club di Bastia strazia in Furiani in ssu principiu di stagione di Lega 3 di ghjocu à pallò. A squadra hè giòvana è li ci vole u tempu di fassi à ssu campiunatu diffìciule. Hè quantunque ottèsimu di a classìfica à 5 punti di u primu è 6 punti di l’ùltimu. Tutte e squadre sò quasi à tocc’à toccu. Vale à dì ch’ellu hè bellu alliventatu di chjamà à a demissione di u presidente cum’elli fàcenu certi mugugnoni. Anu a memoria bella corte di tuttu ciò ch’elli anu arricati i dirigenti bastiacci ! Ssu ghjovi u scheubeu riceve Cannes in Furiani è forse serà tempu di fà tace tutti sti grugnuloni. Forza Ferrandi ! Forza Bastia ! •
