S’hè spentu Mauriziu Papi u 15 di maghju scorsu, à l’eta di 71 anni. Era u fratellu di Claudiu Papi, sparitu in u 1983 lascendu urfanelli u mondu di u ghjocu à pallò ma dinù tutta a Corsica in pientu. È cumè u so fratellu di rinommu, Mauriziu era una fiura di u ghjocu à pallò corsu.
Ghjucatore in l’annate 70 à l’Associu Spurtivu di PortiVechju, era anch’ellu un attachente di talente, ghjuchendu in punta, cù i so schivi è dribli tremendi per tutti i difensori nant’à l’ala manca. Averebbe forse pussutu fà una bella carriera prufessiunale ma cum’è u so fratellu, torna, hè sempre firmatu in a so terra di Corsica. Vincitore di a coppa di Corsica, in u 1971, cù a so squatra di Porti Vechju, campioni di a Divisione d’Onore in u 1972, Mauriziu era un omu chì si pruvava dinù à tutti i sport.
Pallò, tennis, bicicletta, marchja… un omu di a natura, vicinu à a famiglia, à l’amichi, à a Corsica. Anch’ellu si ne parte troppu ghjòvanu lachendu un viotu tamantu pè i soi. À a so zia Santa, à a so moglie Dany, i so figlioli Gabriel è Tania, i so fratelli Ghjiseppu, Patriziu è Marcu, nipoti è nipotini, parenti è amichi, Arritti manda cundugleanze afflitte è fraterne.
Ci piace à pensà ch’ellu sera forse in traccia di pichjà torna in u pallò cù u so fratellu caru, quassù, in i belli giardini di u Paradisu.
Ch’elli ripòsinu in pace.
