Tutt’ugnunu hè statu toccu da l’infurmazione di un Mediterràniu à l’angunìa sott’à e tunnellate di plàsticu sputate da e cità è i fiumoni… Mare nostrum s’ingolla tuttu u nostru mullizzu… è uni pochi di scientìfichi annùnzianu a so morte da quì à qualchi annu.
Ssa crisa di u plàsticu ghjunghje infine à tuccà i grandi di ssu mondu è i dirigenti di tutti i guverni vòlenu scumbàttela. Ma serà forse troppu tardi… Dice Greenpeace, chì u prublema ùn pò più esse regulatu da u riciculamentu. Omu deve piantà a pruduzzione di plàsticu ghjittèvule. Bisognu à eliminà in furia a fabricazione di plàsticu. Sò milliardi di plàsticu ghjittèvule chì sò fabricati ogni annu è chì finìscenu ind’è a natura è l’ecusistemi à impuzzichisce i mezi naturali. Basta ! Certe cità anu già principiatu à riduce a so pruduzzione è s’hè vistu sùbitu una calata di l’impattu di u lozzu nant’à l’ambiente.
Meditteràniu hè in perìculu. Balene, delfini, altri cetacei, tortughe è acelli marini, tutti ss’animali sò in perìculu incù ellu. Tesoru di biodiversità chì conta frà e più belle richezze di a pianetta, hè dinù u mare u più impuzzichitu di u mondu ! Pulluenti da tutte e mamme, idrocarburi, plàsticu… s’assuffoca. D’appressu à WWF, 130.000 tunnellate di microplàsticu si ritròvanu ogni annu in mare nostrum, righjettu di i 150 millioni d’abitanti di u so circondu è di i 300 millioni di turisti chì s’affàccanu tutti l’anni. I turisti raprisèntanu 52% di u lozzu truvatu in mare o nant’à a rena, è 92% di l’attività ecunòmiche, vale à dì più di 410 milliardi di dòllari secondu à WWF. Da quì à 10 anni, averà da cresce torna di 3% è cù ellu e so cunsequenze gattive pè u mare.
I microplàstichi anu francatu a catena alimentaria, tutti l’anni avemu in corpu è in u sangue 11.000 pezzatelli di microplàsticu, ingulliti à traversu i frutti di mare chè no manghjemu ! Chì seranu e cunsequenze pè a nostra salute ? Meditteràniu cuncentreghja e più grande quantità di plàsticu di u mondu cù 250 milliardi di microplàsticu. In più ch’ellu hè mare chjosu, è ch’ellu cunnosce u più impurtante tràfficu mundiale di trasportu di materie periculose ! Si capisce chì malgratu e so 170 arie marine prutette, Mediterràniu n’hà per pocu. 90% di e pruviste di pesci sò sfruttate aldilà di e lìmite biològiche. A Cunvenzione di Barcelona, zifrata in u 2010, dice chì da quì à u 2020, omancu 10% di l’acque custiere dèvenu esse prutette.
Invece oghje ùn raprisèntanu sse prutezzioni chè 4,56% di e sponde di u Meditteràniu.
Disgraziosamente, màncanu i mezi umani è finanziarii per ghjunghje à ss’obbiettivu di i 10%.
Ci vole à scambià di versu, custruìsce un avvene durèvule pè u Mediterràniu, fattu d’un turìsimu ecurispunsèvule, d’una pesca misurata, d’un ecunumìa pronta à curà l’ambiente.
Serà sonniu ?
Fabiana Giovannini.