Sò dui munumenti di a nostra cultura è di u cantu corsu : Canta u Pòpulu Corsu è Felì sò in scena inseme è v’invìtanu à cantà !
Canta u Pòpulu corsu, creatu in u 1973 in tempu di riacquistu da Ghjuvan’Pàulu Poletti, Natale Luciani, Minicale, Petru Guelfucci, tutti sti nomi chì ribòmbanu à i nostri cori, anu accumpagnatu dapoi più di 40 anni e nostre lotte, e nostre brame, à le volte ancu i nostri guai.
Anu datu nàscita à mondu ghjòvani gruppi o canterini è parcorsu millaie di chilòmetri à traversu à a Corsica è u mondu per sparghje à tempu à a cultura è a lingua corsa, e vuluntà d’esse di u nostru pòpulu.
U gruppu oghje hè in scena cù un antra vucione di a Corsica, nata anch’ella da sse brame di u riacquistu, hè in scena dapoi più di 30 anni.
Felì porghje a so voce, u so talente, è a so generosità dapoi ch’ellu hè ghjuvanottu.
Accumpagnatu da u so maestru, u pueta sparitu chì ci lascia scunsulati, Ghjuvan’Tèramu Rocchi, n’hà fattu anch’ellu mondu viaghji !
Accumpagnendu a zitellina è a ghjuventù corsa cù l’associu Scola in Festa ch’ellu hà creatu, Felì hà purtatu a so parte à a nostra cultura è nutritu parechje generazioni di ghjòvani corsi.
Allora, ùn ci mancate, andate pò à sparte cù elli stonde di gioie, d’intusiàsimu è d’apertura. Eccu e date d’appuntamenti.
Ch’ellu canti u pòpulu corsu !
