L’intelligenzia artificiale impenserisce… Da ch’ella possi viaghjà, l’IA abbisogna di sempre più acqua, mettallu è terre scarse. I datacentri sò casamenti maiò carchi à sirvori infurmàtichi ch’abbisògnanu d’acqua per funziunà, assai assai acqua per rifritulisce tuttu u calore ch’elli sgagianu. Ogni sirvore infurmàticu cuntene una mansa di carte eletròniche, cumposte di decine di metalli è minerali sfarenti ch’anu chersu più d’un millaia di prudutti chìmichi per esse create. Frà altru, ci sò puce semicunduttrice chì, per esse fabricate, dice l’associu Reporterre, anu à le volte francatu sin’à 80 fruntiere ! « Una puce di qualchi centìmetri quadrati cum’è quella di l’impresa Nvidia, leader di u marcatu mundiale, pò cuntene circa 200 milliardi di transistori, à a scala nanometrica » dice Reporterre. « St’incastunatura d’una densità materiale scema face di i servori di i datacentri l’ogetti i più intensi in risorze mai prudutte in a stòria umana. Datacentri chì, in più di i servori, cuncentra megawatt di batterie elètrica, di i sistema per rinfritulisce di manera cumplessa. »
In principiu d’istatina, a rivista Resources Policy hà publicatu stimazioni di a cunsummazione di metalli pè i datacentri custruiti per l’IA generative, dice torna Reporterre. « Secondu l’esperti minieri americani, ci hè vulsutu 692.000 tunnellate di metalli in 2025. È ci ne vulerà 2,6 millioni da quì à u 2035. » I prugetti di datacentri di a regione parigina è u Nordu d’una putenza elètrica di 13 gigawatt anu bisognu di 100.000 tunnellate di metalli. Tuttu què, spieca torna l’associu di difesa di l’ambiente, vole dì chì ssi datacentri ùn ponu esiste senza terre scarse. Per un dettu, u terbium, presente in e calamite di e carte eletròniche è i semicunduttori, o u dysprosium chì cuntribuisce à a stabilità termica di i dischi duri.
È induve si tròvanu sse terre scarse ? In i paesi pòveri sfruttati… A China va à circale in Birmania induve batte a guerra dapoi una decina d’annata, sfruttendu i pòpuli di ssi lochi. L’imprese chinese è e so milizie si sò pigliate sse terre antiche induve si praticava a caccia è a cugliera. Ci anu tagliatu l’àrburi, stallatu e so mine in piena furesta tropicale, è per scavà u minerale, ci si spùtanu acidiu è prudutti chìmichi… Dice torna Reporterre, e mine di terbium è di dysprosium anu cuntaminatu i fiumi nant’à centinaie di chilòmetri sin’à a Thaïlande. Ci sò più di 500 siti cusì in Birmania sprezzendu i pòpuli cù l’aiutu di milìzie armate. A dumanda in terre scarse hà da cresce di più in più. U gigante francese Schneider ellu, hà stallatu e so mine di dysprosium è di terbium in i lachi di pesca di l’inuiti è i naskapis arruinèndusi a purezza di ssi lochi. U ramu hè assai ricercatu dinù. Un datacentru n’abbisogna trà 5.000 è 15.000 tunnellate. In Andalusia, una sola mina di ramu cunsumma l’acqua di 66.000 abitanti. À u Maroccu s’àprenu mine malgratu u mancu d’acqua, à u Chili l’imprese strùghjenu i ghjacciaghji. È l’IA generativa hà da multiplicà torna i bisogni. « E suffrenze, e viulenze è l’inghjustìzie pruvucate da u sviluppu di l’IA, a so dimensione ecocidaria è imperiale sò prupurziunale à a so intensità materiale. A successione di crìmini d’un datacentru ne face una bomba sanitaria è geostratègica, un mausoleu di l’ecocidii è di e guerre di ssu principiu di XXIu sèculu » dice torna Reporterre.
L’altru spaventu ch’ella pruvucheghja l’IA hè u so sviluppu chì ùn si pò ammaestrà… è chì puderebbe minaccià l’umanità. Face paura ancu à quelli chì l’anu inventata è chì chjàmanu oghje à frinà u so sviluppu ! •
