Quand’ellu hè statu adupratu u Padduc in 2015, fora di a dritta, tutti l’eletti di l’assemblea di Corsica si sò arrizzati per sciaccamanà. Hè statu un mumentone. Un sullevu, allora ch’ellu fecia più di 20 anni ch’omu aspettava una strategia d’accunciamentu di u territoriu, scumbattendu appressu à e lege d’urbanìsimu ma dinù l’urientazioni da piglià per un sviluppu ecunòmicu è suciale durèvule.
Dopu à « Innò à stu Padduc » (quellu di a diritta chì vulia strughje frà altru a lege liturale), i naziunalisti anu appughjatu u travagliu alternativu di Maria Guidicelli (mandatura Giacobbi) incaricata di ricuncilià à tutti per custruisce un documentu à tempu pianu di sviluppu, scemà d’accunciamentu di u territoriu, è prugettu di sucietà. Parechji documenti li sò stati cusì arrimbati, cum’è a Càrtula di lotta contr’à a precarità, u scemà di messa in valore di u mare, u scemà culturale, u pianu di a muntagna, u scemà di i trasporti, u scemà di u sviluppu turìsticu, u librettu è l’Atlas di u Liturale, a trama verde è blù, senza parlà di e so numarose càrtule è di u librettu regulamentariu.
A memoria hè corta, ma, allora ch’omu parla à chì ne vole d’autunumia, ci vole à ammentassi chì u Padduc hè a prima lege (iè, lege !) chì i Corsi si sò dati dopu à dibàttiti è dibattitoni, cuntribuzioni, nuttate in biancu, seminarii è attelli da tutte e mamme, inchieste è cunsultazioni à più pudè… È saremu incapaci oghje di difèndela sta lege ?
Ci vole à ricunnosce disgraziosamente chì poche sò e ricummandazioni chì sò state appiecate, è pocu sò l’orientazioni ch’anu servuti à mette in ballu pulìtiche pùbliche.
Eppuru. Sulleoni è sicchina, inundazioni, scarsità di l’acqua, pulluzioni di u mare, pèrdite di i spàzii agrìculi, rinculu di e coste, urganisazioni di i trasporti, interni è esterni, crèscita di a precarità, mancu d’alloghju, pèrdita è inchietùdina identitaria, eccèttera, eccèttera… u Padduc porghje risposte à tuttu. Pigliemu l’esempiu di u focu, l’evuluzioni mundiale ci cundànnanu à appruntassi di più. A prevenzione ùn s’agisce più solu oghje di smachjà, o di pustà camiò è spendifochi nant’à u bordu di strada à fà attenti à qualchi fumi è primi segni d’un focu… Oghje si capisce ch’omu ci tocca à pensà à i rìsichi di fochi bellu nanzu à ch’elli accàdinu. Accuncia u territoriu, ùn hè solu priservà terre agrìcule o naturale da e quale omu hà bisognu per pruduce o pè u so benestà. Accuncià vole dì urganizà u sviluppu di a manera a più intelligente è cumpletta pussìbule : quì si pruduce, quì si custruisce, quì s’urganizeghja l’infrastrutture, quì si lascia a natura rispirà. À tempu ch’omu pensa u so spàziu, à tempu prevene i rìsichi maiò, cum’è i megafochi o e grande inundazioni. Bisognu à appruntassi.
A dice l’espertu universitariu Ghjuvan’Luigi Rossi, « l’accunciamentu di u territoriu custituisce un di i principal’arnesi di prevenzione. Ci vole à pensà à tempu à i lochi induv’omu custruisce, à l’attività ch’omu mantene, à a manera di rege a vegetazione è à e cundizioni in e quale i succorsi puderanu agisce. A resilienza ùn si custruisce micca quand’ellu parte u focu : s’appronta durante annate, in e decisioni cutidiane d’urbanìsimu, d’agricultura, di gestione furestera è d’invistiscimenti pùblichi. Infine chì, u nostru scopu ùn pò esse d’impedisce u focu o di ricercà l’assenza tutale di terre brusgiate. Deve esse d’evità chì l’incèndii ùn divèntinu catastrofe umane, suciale, eculògiche è ecunòmiche. Vale à dì cuntinuà à rinfurzà e nostre capacità uperaziunale, ma sopratuttu custruisce cullettivamente territorii capaci d’anticipà, di resiste è d’alzasi ».
Eccu, u sumerinu… •
