L’11 di marzu serà a cumemurazione di a catastrofa di Fukushima. 8 anni dapoi quellu ghjornu maladettu di u tsunamì ch’hà annigatu millaie di personi, a centrala nuclearia è pruvucatu a messa in bullore di u cumbustìbule. È cù ellu, a splusione, a pèrdita di u corium sottuterra è di l’acqua cuntaminata in l’oceanu, a ghjente spatriata, a zona cundannata per decine è decine d’annate… Oghje, Tepco (l’EDF giappunese) è u guvernu dìcenu ch’elli anu nittatu i lochi, ch’ellu ùn ci hè tantu cunsequenze sanitarie, ch’elli anu fattu prudezze technulògiche, chì u Giappone ne vene più putentu, capace di dà pettu à tragèdie cume quessa, chì a situazione hè « nurmalizata »… Umbèh… Ùn precisèghjanu micca chì u sesium, u strontium, u plutonium… sò sempre quì, ind’è l’ària, a terra, l’acqua… capite, i radiunecleidii ùn si vèdenu micca ! È ùn pàrlanu micca di ssi malati da tutte e mamme. Un tale, puru ghjòvanu, hà avutu una crisa cardiaca, un antru soffre d’un càncaru, un antru di malfurmazione aortiche… Ùn vi dìcenu micca l’aumentazione di i prublemi di tiròida, di melanomi, è altre malatìe grave oppuru di sse pattulugìe anurmale pè i zitelli, cum’è a cataratta.
Eppò ci sò ancu e malatìe clàssiche chì si spàrghjenu di più. A grippa si chjappa tutta l’annata, micca solu d’inguernu. E punture sò cose frequente, dinù e meningite o e malatìe rispiratòrie.
E persone sò di più dèbule chè nanzu. A ghjente hè dinù di più nerbosa è i cunflitti nàscenu più spessu. A curtesìa legendària di i Giappunesi ùn hè più quella. Eppò l’àrburi si ne mòrenu, o allora, ùn fiurìscenu più, pèrdenu e so rame, parechje spèzie d’animali si vèdenu di menu. È sè i mèdia ùn pàrlanu di a sparizione di u so parente, u so amicu, u so vicinu, postu ch’ellu ùn tocca chì ghjente scunnisciuta… ùn scappa à nimu i drami di i people ! Rikako Ikee, 18 anni, superstar di a natazione giappunese minata da una leucemìa, Nosuke, 29 anni, cantatore di rinomu, toccu da un càncaru testiculare, Hitomi Kamanaka, 61 anni, sineaste curatu per un emurragìa cerebrale, Enraku Sanyutei, 68 anni, cuntatore assai cunnusciutu anch’ellu, s’hè fattu operà d’un càncaru à i pulmoni, Masao Yoshida, direttore di a centrala di Fukushima, mortu u 9 di lugliu 2013 d’un càncaru di u ghjargastru… eccèttera, eccèttera… U 18 di marzu 2011, una settimana dopu à a catastrofa, Akio Komori, u direttore di Tepco, s’era sfundatu in làcrime davant’à i mèdia dicendu « avemu cappiatu quantità murtale di radiuattività »… Oghje sse quantità fàcenu pianamentu u so travagliu nant’à l’omi è a natura.
Fabiana Giovannini.
