V’arricurdate ssu ciucciu ch`ùn ghjunghjìa à ottene un visà per entre in Francia ? Dopu à quasi trè anni à scumbatte contr’à l’amministrazione francese, ci simu ghjunti ! Karama hà u so visà è hà da pudè ritruvà i so parenti. Hinda è Nicolas Lagasse stanu in Francia, in Metz. Ella hè franco djibussiana. Ellu hè francese. Ùn ponu avè ciucci è anu vulsutu adduttà.
Karama ellu, hè statu abbandunatu nant’à a rena quand’ellu era una criaturella. Nisun filiazione biològica ùn hè stata trova. Hè custì tandu chì a strada di Hinda è Nicolas, è quella di Karama si sò incrucciate. Visitendu una casa d’urfanelli, i Lagasse càscanu nant’à ssu ciucciu è s’innamurèghjanu di i so ochjoni tristi. U zitellu ùn hà mancu un annu à quella èpica. Parte Djibussiana, e cose si pàssanu bè, i Lagasse addòttanu Karama è pònenu una dumanda di visà. Hè custì tandu chì l’affari s’ingattivìscenu.
U visà hè statu ricusatu quattru volte, à quandu disciulèghjanu nant’à a so religione musulmana (ammentemu chì u ciucciu tandu ùn hà mancu dui anni !), à quandu li rimpròvenu d’ùn avè purtatu a prova ch’ellu avìa di chè campà in Francia, à quandu li dìcenu ch’ellu ùn hà micca assicuranza malatìa, à quandu tèmenu ch’ellu firmessi in Francia di manera illegale per « cunduce attività difese », à quandu pènsanu chì l’infurmazioni date ùn sò ghjuste… Puru, u 16 di nuvembre 2016, Karama hè statu legalmente adduttatu, porta dapoi u nome di i so parenti, Karama Lagasse, è hà un passaportu in règula. U 3 d’aprile di u 2018, a Càmera Civile di u Tribunale di prima richiesta hà prununziatu l’adduzzione piena è irreversìbile. Hinda è Nicolas sò i parenti legìttimi di Karama. Ricusali un visà ùn si spiega micca, hè abusu è disprezzu ! S’ella s’hè sbagliata l’amministrazione, o s’ella stima avè a raggiò, perch’è ùn anu micca spiecatu à ssi corci parenti a suluzione pè ssu zitellu ? U tempu hà filatu. Karama hà suffiatu e candele di dui anniversariu, ma ùn hè ghjuntu à spaccà i tràmpali amministrativi è meschini francesi. U 28 d’aprile 2018, Femu a Corsica hà postu una muzione ch’hè stata adduttata à l’unanimità. Da ch’ellu sia cuncessu un visà per ssa criatura. L’affare, l’avemu capita, ùn hà nunda à chì vede cù a Corsica. Si passa in altrò, i parenti stanu in Metz. L’Assemblea di Corsica hà vulsutu quantunque porghje a so sulidarità, testimuniendu generosità è umanìsimu degni di mumenti di a nostra stòria cullettiva, quandu a Corsica si fecìa chjamà « l’ìsula di i ghjusti ».
Benvenutu ind’è tè o Karama !
Fabiana Giovannini.