Sacchetti è sacchettini, biitucci, paglie, buttiglie è stuviglii da tutte è mamme, u plàsticu hè dapertuttu dapoi quasi dui sèculi… Hè statu inventatu a prima matèria di plàsticu celluloida in u 1869. U PVC o clorure di polyvinyle hè statu inventatu deci anni dopu. Dapoi, a so sparghjera ùn face chè cresce, multiplichendu l’usi è l’indispensabilità di sse matèrie pràtiche chì ponu accunciassi quasi à l’infinitu. Ma u troppu stroppia. Oghje, u plàsticu assufoca u Mediterràniu. A dice l’associu WWF ind’un raportu ch’imprimureghja assai sti pochi tempi. Basta à andà à vede sottu l’acqua, basta à fighjulà tutti i mulizzi accatastati nant’à e sponde marine, basta à vede a pulluzione di i fiumoni, basta à fà l’analisa di u nostru sangue, per truvà pezzi di plàsticu dapertuttu, da i più maiò à i più microscopichi. A càusa ? A mundialisazione è u so disprezzu di a natura è a biodiversità in u mondu sanu. U turìsimu di massa (200 millioni di turisti ogni annu) è a pressione fundaria di i 22 paesi di u circondu mediterràniu in più per noi.
L’Auropa hè u secondu pruduttore mundiale di plàsticu è a Francia hè u più grossu pruduttore à sputali in mare, cù 4,5 millioni di tunnelate di lozzi in plàsticu è solu 22% di matèria riciculata. Vale à dì chè u restu finisce ind’è a natura, è pè u più ind’è u mare cù cunsequenze tremende nant’à a biodiversità marina. Pesci, ma dinù cuppulate, cetacei, acelli marini, sò tombi ingullèndusi pezzi di saccetti di plàsticu, tappi di buttiglie, eccèttera. L’omi, l’associi di difesa di l’ambiente, è ancu e cullettività ponu pruvà di pullisce quant’elli vòlenu e sponde, ci n’hè sempre di più, è a realità di ssu scempiu ùn si pò più piattà. In Marseglia, dice WWF, sò 1000 chilòmetri quadrati di lozzi di plàsticu, in Nizza, 578 chilòmetri quadrati… L’effetti nant’à a salute di l’omi è di l’animali hè gattivu, e cunsequenze ecunòmiche dinù. Sta pulluzione costa 73 millioni d’àuri à a Francia ogni annu. Solu per pullisce.
U custatu hè tremendu, 95% di i mullizzi truvati nant’à e sponde o nant’à u mare sò muéllizzi di plàsticu. S’ellu raprisenta 1% di i mari di a pianetta, u Mediterràniu, cuntene 7% di i microplàstichi cù 1,25 millioni di pezzatelli cuncentrati à u metru quadratu. Vale à dì 4 volta di più chè u famosu cuntinente di plàsticu in u Pacificu nordu. Simu lecchi.
Fabiana Giovannini.
