L’incendiu in Rouen di u situ industriale Lubrizol hè una catastrofa eculògica è sanitaria tremenda. Hè dinù un scàndalu di Statu. Unu di più ! U guvernu hà buciardatu senza vergogna, diciendu ch’ellu ùn ci era pulluzione… vultènduci 33 anni nanzu, quand’u nùvulu radiuattivu di Cernobile s’era cusì dettu piantatu à a fruntiera !
Ministri è prefettu si sò affannati à dì ch’ellu ùn ci era nisun rìsicu in Lubrizol, chì sta fumaccia ùn era tòssica, o cusì pocu. In u stessu tempu piuvìa idrocarburi in tuttu u rughjone, culture sò state impuzzichite, pruduzzione di latte interdetta, pesci in i fiumi sò morti, è millaie d’abitanti sò stati malati.
À tempu chì u Statu fecìa sapè ch’ellu ùn ci era pulluzione, i so pulizzeri èranu prutetti da màschere di filtrazione… umbeh… Parechji ghjorni dopu, s’impara chì millaie di tunnellate di tigliu sò state brusgiate, cappiendu fumaccie pèssime per l’aria è i pulmoni di l’omi. Dinù per ùn sò quantu prudutti gattivi, frà i quali certi sarèbbenu ancu radiuattivi.
Ci hè statu parechje splusioni è u focu hà duratu un bellu pezzu furmendu un nùvulu neru nant’à parechje centinaie di chilòmetri ! U situ di Lubrizol hè statu digià toccu da incèndii, in u 2013, pò di sittembre di u 2019, trè settimane nanzu à questu quì… Eppò ci hè un antru scàndalu. U prefettu hà datu u so accunsentu per chì l’usina possi aumentà a so capacità à cuntene prudutti periculosi. A lege hè stata ammullita st’ùltimi anni. Di ghjugnu 2018, u guvernu hà pigliatu un decretu per riduce l’ubligazione di sottumèttesi à un evaluazione ambientale pè i siti industriali. Vale à dì oghje, hè u prefettu chì decide o nò di fà st’evaluazione. Nanzu era un autorità indipendente è esperta. Ma per ùn incumudà micca l’imprese è permette d’andà più in furia ind’i prugetti, hà decisu u guvernu Macron/Philippe di rinfurzà u putere di i so prefetti.
Hè cusì ch’ellu ùn ci sò più inchieste sèrie nanzu di piglià decisioni cusì impurtanti per l’ambiente è a salute di e populazioni. Lubrizol hà dunque pussutu aumentà e so riserve di prudutti tòssichi è infiarèvuli sopra piazza di parechje millaie di tunnellate è hà avutu l’autorisazione d’accatastà ssi prudutti in i stessi bastimenti… In Francia, crèscenu i puteri di l’industriali, è càlanu i dritti di l’ambiente è di a ghjente à l’ingiru chì pate di ssu pocu primura di u guvernu per l’eculugìa è a salute pùblica.
Zifrate a petizione chì dumanda un inchiesta sanitaria è ambientale nant’à e cunsequenze di l’accidente di Lubrizol : https://bit.ly/2mQn4Xw
Fabiana Giovannini.
