Più d’un millaia d’astronomi anu zifratu una lèttera inseme per dumandà di piantà in fùria u lanciu di i sattellite 5G. Una chjama internaziunale di scientìfichi da chì i guverni piglièssinu cuscenza di l’ingombru di più in più zeppu ch’elli fòrmanu ind’è u spaziu tutti st’attrazzi. Ùn si pò cuntinuà cusì, chì, à mumenti, ùn ci si viderà un acca di l’universu. «A sparghjera di tutta sta flotta di sattellite minaccia e capacità d’osservazione di a pianetta » dìcenu i scientìfichi chì dinùnzianu l’avvilimentu di i strumenti d’esplurazione terrànii. I so stùdii sò già disprezzati assai. I sattelliti sò più chjuchi è spapersi di manera massiva à sfarenti livelli d’altitùdine, da pudè migliurà e cunnezzioni. Fattu si stà ch’elli sò più luminosi chè l’oggetti in osservazione ind’è l’occhjaia terrània. È u so nùmaru hè previstu d’esse multiplicatu omancu da trè ! Trà a pulluzione visuale, quella di i chjàppuli spaziali, l’omu trasporta u lozzu in cielu ! Digià chè n’avemu impuzzichitu machje è mari, da quì à qualchi tempu, cosa s’assumiglierà a pianetta turchina da u spàziu ? È ùn hè solu un prublema di pulluzione… l’ingombru di tutti st’ogetti impedisce di più in più l’osservazione chì para l’impatti putenziali cù meteorite. «Hè tempu di mòvesi. Dumandemu à i guverni, l’istituzioni è l’agenzie di cumunicazione di guarantisce à u livellu mundiale una prutezzione ghjurìdica à l’istallazioni astronomiche nant’à a terra cù tutte e so pussibilità elettromagnettiche d’osservazione. Dumandemu dinù di piantà u lanciu di Starlink* è altri prugetti, è d’attempà tutte e technulugìe chì ponu avè un impattu negattivu nant’à l’osservazione astronomica da u spàziu è da a terra ». Chjìbba ! L’affari pàrenu sèrii !
Dumàndanu torna ssi scientìfichi di mette in ballu un stùdiu nant’à i rìsichi è l’impatti da prevede nant’à l’osservatorii astronomichi. È dunque, chì a Cummissione federale di e cummunicazioni di i Stati Uniti o tutte l’agenzie chì l’assumìglianu, misùranu e cunsequenze di l’autorisazioni ch’elle danu, pè u più quelle di i sattelliti chì gìranu à livelli bassi.
Dumàndanu dinù una Cuurdinazione mundiale di tutte l’agenzie astronomiche naziunale è internaziunale chì possi dà un vetò nant’à i prugetti di lanciamentu sattellitu. «Ci vole à riduce u nùmaru di flotte di sattelliti di cumunicazione à u tantu chì basta » dìcenu torna l’astronomi, « è fà chì l’usu di u spàziu extra-atmosfericu para a cuntaminazione gattiva nant’à l’ambiente di a pianetta, è i rìsichi pè a salute pùblica di e personi ». Rivendichèghjanu « un drittu à u cielu di notte nant’à u pianu ghjurìdicu è dassi règule internaziunale cumune per prutege e bande astronomiche d’osservazione. Da pudè cuntinuà à mirà l’Universu è studià u cosmossu ».
Fabiana Giovannini.
