Eccu. Avemu francatu un antru 5 di maghju, u vintutèsimu dapoi a tremenda catastrofa. È sempre e stesse interrugazioni punte in core. Duve saranu andate quelle voce à cantà ?… Perch’è cusì tante suffrenze in li nostri campà ? Perch’è ss’arrubu di ssa festà tamanta ch’appruntàvamu inseme ? Perch’è ssu malèssere dapoi 28 anni, ssu dolu ch’ùn ne finisce mai…
18 morti, è ancu 19 dapoi tandu. 2357 feriti. È quantu feriti in core ? Pensu chì tutti quelli ch’èranu in Furiani quella notte maladetta sò cascati anch’elli. È uni pochi dinù davant’à u so scrinu à impenserìscesi pè a figliola, u figliolu, u babbu, a mamma, u fratellu, a surella partuti à fà festa è ch’ùn sò mai vultati lachèndusi in un cumbugliu di ferrame a so sciarpa turchina.
Eppuru… chì bella stagione pè u Sporting ! Chì festa, chì emuzione cullettiva, u 21 d’aprile quandu Bastia vince à Nancy in quartu di finale. Chì ecitazione è fiertà à l’annunziu di a meza di finale contr’à l’Olympique de Marseille dui ghorni dopu !
Eppuru… a scimità di l’omi, u prufittu, u sguazzu, a spluttazione di a gioia cullettiva di l’uni… Eppò ssa tribuna, ssu disprezzu di a vita, ss’ochji chjosi, ssu lascià corre di e più alte autorità… L’orgogliu, l’abbacinime, a scimizia di l’altri.
Ott’ore vinti… ssa spinatura versu u viotu, ssu rimore affundatu ind’e nostre arechje sturdulite, sguardi sbiguttiti. I mughji, u stupore, eppò… u silenziu.
28 anni. Di dulore, di mancanza, di pentimentu cullettivu. Eppò di lotta. Pè a vita. Per quelli chì l’anu persa. Pè i pienti, i dulori, e prumesse perse. Pè e malfatte è e scruccunerìa. Pè u ghjocu à pallò cum’è u vulerìamu, rispettosu, di spartera è di cumunione.
Fabienne Giovannini.
28 anni per strappà è fà aduprà infine una pruposta di lege da l’Assemblea Naziunale
u 13 di ferraghju 2020.
Pruposta di lege di u nostru deputatu Michele Castellani ch’hà da duvè francà torna a prisentazione à u Senatu nanzu di vene definitiva.
Qualsìasi a so sorte, ci hè vulsutu 28 anni di preghera è rivendicazioni per ghjunghje à ss’esame di cuscenza di pettu à u foot business. Ch’ella sìa infine intesa ssa voce turchina.
Arritti manda tutte e so pensate affettuose à i membri di u Cullettivu di e vìttime di Furiani.
Mai più scontru un 5 di maghju.
Era un 5 di maghju
Era un cinque di maghju
Sentu sempre vucià
Si calava u ragiu
Annuttava digià
Era un cinque di maghju
In li nostri campà.
Duve sò spaisate
Quelle voce à cantà
D’altre chì sò vultate
L’anu intese chjamà
Duve saranu andate
E so sciarpe à vulà
Indu e stelle turchine
O quale hè chì a sà
E campane latine
L’anu viste passà
È tante altre matine
Pienghjenu sempre avà
Era un cinque di maghju
Chì ùn si vole chjinà
Era un cinque di maghju
Perdunateci Mà…
I Muvrini.