U Cumitatu Scientìficu cunsultativu Covid19 hà dettu, ssu 23 di maghju, chì l’accolta di a ghjente in Corsica ssu mese di ghjugnu chì principia a stagione istatina, deve fassi imperativamente cù a prisentazione « d’un testu negativu à u virus, nanzu d’aduprà un mezu di trasportu da francà Meditterràniu. U Cumitatu Scientìficu di a Cullettività di Corsica teme un rifiatu di l’epidemìa. Tandu sarebbe tremendu. Hà travagliatu nant’à « simulazioni mattemàtiche » è cunclude à un passu è vene di a ghjente « cundiziunalizatu à a prisentazione d’un testu PCR negativu o à un testu serulogicu pusitivu ». « Ssa precunisazione permetterebbe d’assicurà a sustenabilità di l’aumentu di pupulazione istatina senza rìsicu di saturazione di l’uspidali o di ritornu di l’epidemìa » dice torna u Cumitatu. A simulazione s’hè fatta cù una previsione di calata di a frequentazione per raportu à 2019 è 2018 circa 50%. Vale à dì una pupulazione in più à pocu pressu di 250.000 personi. Vistu a resilienza di u virus, 500 personi malati risichèghjanu tandu d’entre in Corsica, frà i quali, 26 cù un bisognu d’esse uspitalizati ! Dice u Cumitatu: «Vistu l’ingorgu istatinu di i servizii d’urgenze è di rianimazione, aghjustà un pesu di 26 personi pussìbule Covid19 pè u solu mese di ghjugnu ùn pò esse suppurtatu da e strutture di l’uspidali. Da sapè chì u tempu d’un passagiu in rianimazione hè di règula di 3 settimane ».
In casu d’un testu fattu nanzu à a partenza, e simulazioni mòstranu chì «menu di 100 personi sarìanu malati, frà i quali 4 sarìanu uspitalizate ». Vale à dì una calata di u rìsicu impurtante. « E simulazioni mòstranu un rìsicu d’ingorgu ràpidu di i servizii di rianimazione di l’uspidali à u mese di ghjugnu… Fà un testu PCR negativu trà 4 à 7 ghjorni nanzu di parte, permetterebbe di riduce cù un fattore 5 u nùmaru di i malati pussìbuli ». U Cumitatu s’appoghja nant’à a capacità sanitaria di l’ìsula, vale à dì un màssimu di 69 letti di rianimazioni ind’è l’uspidali di Bastia è d’Aiacciu, frà i quali 54 sò previsiti pè u Covid. Sapendu bè chì, d’istatina, ssi servizii di rianimazioni sò assai sullicitati. Per avà a simulazione ùn hè stata pussìbule pè i mesi di lugliu è d’aostu. Si puderà fà di manera più precisa vistu i passi è vene di pupulazione, in ssu mese di ghjugnu.
Aspettendu, l’avisu di u Cumitatu Scientìficu di a Cullettività di Corsica vene cunfirmà l’astutezza di a dumanda di «green pass » fatta da u presidente di u Cunsigliu Esecutivu. È ùn hè solu à bramà ssa pussibilità da pudè securizà à livellu sanitariu l’accessu à u territoriu à tempu a pussibilità di mantene una stagione. A Sicilia, a Sardegna, l’Islanda, sò ìsule ch’anu adupratu sta misura di «passaportu sanitariu». L’urganisazione mundiale di u turìsimu (OMT) vole ancu pruvàssila, urganizendu un volu di sperimentazione, dettu di « securità sanitaria », ind’è l’isule Canarie. L’ìsule sò frà i territorii i menu tocchi da u Covid (menu di 0,1% di a pupulazione). Hè quì dunque chì l’OMT vole evaluà l’efficacità di a misura di passaportu sanitariu da fà di l’ìsule Canarie frà e destinazione e più sicure da u puntu di vista sanitariu. Eccu.
Fabiana Giovannini.
