A federazione Scola Corsa hà annunziatu a bona nutizia di a cuntrattualisazione di u so retale cù u Statu. Vale à dì chì, cum’ella a permette a lege dapoi u 1959 à e scole cunfessiunale private, è dapoi quarant’anni à e scole assuciative di u retale Eskolim d’insignamentu immersivu in lingua regiunale, u Statu s’ingagia à ogni rientrata di piglià in contu a paca d’unu o parechji insignanti di sse scole, secondu una neguziazione chì s’ingagia tutti l’anni. Ùn era ancu fatta per Scola Corsa chì u Statu dumanda un periodu prubatoriu di cinque anni. Hè in fin’di contu accurdata cù un annu d’avvanzu è ghjè una grande nutizia. Arritti ne feliciteghja tutti quelli chì si sò impegnati dapoi quattru anni ! Hè segnu d’una ricunniscenza di u sèriu è di l’efficacità di sse scole assuciative immersive in lingua corsa. Cù quattru siti, più di 200 elevi à a pròssima rientrata, una trentina d’impiecati, Scola Corsa piglia u so pesu in u cumbattu pè u riacquistu di a nostra lingua, ma dinù in u paisagiu ecunòmicu di a Corsica. Arritti hà scuntratu u so presidente, Ghjiseppu Turchini, chì ci spieca u travagliu fattu è e brame di sse scole chì fàcenu un travaglione à prò di a furmazione di i corsufoni di dumane.
Scola Corsa hà digià quattru anni. S’appronta à cinquèsima rientrata. Cumu si pòrtanu e vostre scole ?
Scola corsa cuntinueghja à traccià a so vìa, cù un rìtimu di criscenza apprezièvule è pigliendu cura à ùn fà u passu più maiò ch’è a infurcatura. Sò primurosi tanti parametri : a qualità di l’insignamentu, u so cuntenutu, u riclutamentu è a furmazione di l’insignanti è di l’aiute materne, a gestione cuntàbile, l’aspetti amministrativi… U prugettu hè passiunante è ci dumanda assai esigenza ma hè una suddisfazzione cutidiana di gode i risultati acquisti. Zitelli spannati, perfettamente bislingui, aperti à d’altre culture, agenti dinamizanti di u so ambiante famigliale è sucetale, dimarchja aperta nant’à e prublemàtiche patrimuniali è ecunòmiche di l’ìsula : eccu i veri mutivi di cuntintezza. Tengu à rende omagiu dinù à l’investimentu di u persunale è di i parenti chì si danu di rimenu pè cuntribuisce à a qualità di u nostru dispusitivu.
À chì ne simu oghje, quantu zitelli ? Quantu maestre è aiute materne ? Senza cuntà l’amministrativi… site una vera impresa avà !
Ad oghje cuntemu 11 maestre-i è 12 aiute materne. Averìamu da passà da 26 impiegati (cù e trè cullaburatrici amministrative attuali) à 32 quist’annu chì vene. Sò 147 l’elevi di e nostre quattru scole (Bastia, Biguglia, Corti è Sàrrula è Carcupinu) è trabarcheremu i 210 di settembre chì vene.
Sò aperte e scrizzioni pè a prossima rientrata… cunterà un’antra scola u retale ?
Sò aperte e scrizzioni nant’à ogni situ. Si ponu buscà e infurmazioni nant’à i retali o piglià cuntattu cù a nostra direttrice amministrativa è pedagògica*. Per altru, difatti, emu annunziatu di cuncertu cù a municipalità di Lucciana a creazione d’un situ novu nant’à a cumuna. Simu pròpiu felici di sta cullaburazione. A squatra municipale luccianinca ci accoglie cù dispunibilità è entusiàsimu. Ch’ella ne sia ringraziata quì. Simu in traccia d’ingiardinà un prugettu pedagògicu ricchìssimu à paru à u patrimoniu stòricu è culturale di stu bellu territoriu.
Avemu amparatu a bona nutizia di a cuntrattualizazione ch’ella aspettava a Corsica per dà una dinàmica più forte d’apertura di scole. À chì ne site ?
Vene d’esseci cumunicata a bunìssima nutizia da l’ISLRF è da u rettore di l’accademia : ci hè stata accurdata da u ministeriu di l’EN una cuntrattualizazione anticipita d’un annu pett’à i cinque abituali di u periudu dettu prubatoriu. Porta nant’à dui posti, unu in Bastia è un antru in Biguglia, prime scole di u retale. A interpretemu cum’è a ricunniscenza di u nostru travagliu fundìu è a valurizazione di a qualità pedagògica messa in òpera in e nostre classe. Hè dinù un segnu pulìticu forte postu chì u passeghju sott’à cuntrattu cù l’Educazione naziunale ci integra à u dispusitivu accademicu. Simu digià in una lògica di leale cullaburazione postu chè n’accugliemu stazianti di l’università è chè no rispundimu à l’attese esigite da l’auturità. Principia ormai una segonda fasa di u nostru sviluppu chì deverà esse inquatratu da un statutu legale securizatu, cù un pattu istituziunale chjaru trà i servizii di u Statu è di a CdC chì cuntinueghja à puntellà a dimarchja. Cù l’adattabilità originale di i so cuntenuti, u retale assuciativu deve cuntinuà à ghjucà u rollu emulativu ch’ellu hà indiatu fin’à avà è vene in cumplementarità di laboratoriu avanzatu riguardu à u serviziu pùblicu.
Parlèmune : in u pùblicu, s’àprenu di più in più e scole immersive dinù. È e parulle di u rettore pàrenu… rivuluziunarie, nò ?
Avìamu scuntratu u sgiò rettore dop’à a so numinazione è ci avia sùbitu palisatu e so ambizioni pusitive inquant’à u sviluppu di u dispusitivu bislinguu è ancu immersivu in l’accademia. Ci rallegremu pròpiu di stu cambiamentu di scala è di u discorsu decisu chì u porta. Quattru anni fà, l’immersivu apparia cum’è un furmatu cunfidenziale ; oghje, hè à u centru di tutti i ragioni. Forse ci seremu per qualcusella. St’ogettivi ripresèntanu una scumessa chè no devimu tuccà tutti inseme : si tratta di mubilizà e risorse esistenti, di creà un vivaghju di futuri insignanti è di riesce à fà cresce u dispusitivu quantitativamente è qualitativamente cù una valutazione permanente di l’ernesi messi in anda.
Chì ghjè a sfarenza trà pùblicu è assuciativu ?
U pùblicu ferma in a so cunfigurazione di sperimentazione cù un’immersione chì pò andà da 50 à 70 % di u tempu sculare. L’autunumìa di u nostru retale prupone, ellu, un’immersione integrale sin’à u CE1 induv’ellu vene intruduttu u francese dop’à l’amparera fundamentale di a scrittura è di a lettura. L’aiute materne, e cantinaghje è l’intervenenti, tutti cursofuni ghjòcanu dinù un rollu essenziale. Hè stu furmatu quì chì hà fattu e so prove dapoi tant’anni ind’è i nostri amichi d’Eskolim è pruduttu generazioni sane di perfetti lucutori asgiati in parechje lingue. Hè pròpiu essenziale ch’ellu cuntinuessi à cresce.
« U retale assuciativu deve cuntinuà à ghjucà u rollu emulativu ch’ellu hà indiatu fin’à avà è vene in cumplementarità di laboratoriu avanzatu riguardu à u serviziu pùblicu. »
Appuntu, Scola Corsa vince ssu rinommu à l’infora… postu ch’hai pigliatu a presidenza di Eskolim à l’ùltima adunita generale. Spiècaci un pocu ciò ch’ellu hè Eskolim è i to prugetti…
Hè ghjusta. I cinque altri retali anu purtatu u nostru à a presidenza di a federazione Eskolim. Quì dinù, hè una testimunianza maiò di cunfidenza è di stima chì ci hè accurdata. Sta presidenza ci onureghja propiu è ci impegna altrettantu. Circheraghju à esse u degnu ripresentante di i mo pari durante u periudu di respunsabilità chì s’apre. U cartulare priuritariu ch’ellu ci vole à purtà hè quellu di a securizazione di l’insignamentu immersivu assuciativu. Dopu à l’aduzzione di a lege Molac à l’Assemblea naziunale, paradussalamente, s’hè andatu indietru cù un arrestatu di u Cunsigliu custituziunale assai custringhjente chì ripresenta una vera spada di Damuclè suspesa sopr’à i nostri capi. Una cumissione parlamentaria hà currettu stu testu cù una circularia detta « circularia Castex » chì, per avà, ci rege da riferimentu quatru ma chì pò esse rimessa in càusa à ogni istante. Altri punti impurtanti : u versamentu di u furfettu sculare da e merrìe, l’armunizazione di e cundizioni di carriera cù u Pùblicu, a presa in contu di l’elevi cun dificultà… hè longu u listinu di i prugressi chì si fèrmanu da fà.
Cosa hè u bilanciu di Eskolim, crèscenu e scole culandi dinù ? Perchè hè impurtante di firmà in lea cù tutti retali ?
Eskolim, à tavers’à i so sei retali scularizeghja 14.244 elevi, da a materna sin’à u liceu in 188 stabilimenti (168 scole, 16 cullegi è 4 licei). Sò edifichenti i risultati d’un mudellu pedagògicu chì stimuleghja i parangoni linguìstichi, e virtù cugnitive cerebrali è l’apertura à prublemàtiche universali nòbili. I parenti sanu oramai chì u bislinguìsimu hè una carta maestra pè i so figlioli è ch’ellu pruduce un’ammaistrera più soda di u francese. Quessa apròvanu i risultati òttimi à u bascigliè ottenuti ogni annu da i licei d’Eskolim. Sò primurose e nostre leie cù i nostri amichi chì ci fàcenu benefizià di a so sperienza pedagògica, logìstica è amministrativa, vechja di 50 anni per certi.
Eppuru, ùn si pò ancu dì chì a nostra lingua hè salva… Chì ghjè a situazione oghje, crèscenu i locutori ? U bislinguìsimu in a sucetà ? Cosa ci manca per sbuccà in veru ?
Ùn piattèmucila : a lingua nustrale hè in rinculu. A pràtica famigliale è sucetale ùn sò più quì cum’è 50 anni fà da assiguralli una sparghjera naturale. Ciò dettu, regioni cum’è a Catalogna, u Paese bascu o u Paese gallese per u indettu ci insègnanu chì a rivittulita di lingue minuritarie minacciate riesce più ch’è bè quand’omu si dà i mezi di guidalla. A scola hè u fundiale di sta pulìtica pùblica ma ùn basta s’ella hè sola. A ridinamizazione di i i parleti nativi deve esse purtata da stituzioni pùbliche cum’è un offiziu di a lingua chì esiste dapertuttu è move pianificazioni sinnute. Quì dinù, d’altri ci anu apertu a strada, basta à ripruduce ciò chì hè statu efficace altrò : mèdia, televisione, ràdiu, retali suciali, amministrazione, mondu pulìticu, assuciativu, spurtivu, ecunòmicu, creazione culturale, literaria, teatrale, cantu, affissame pùblicu, signalètica : ogni settore è ogni cumpunente di a sucetà deve esse puntellatu in u so impegnu. Infine, e tecnulugie nove, l’ernesi muderni di traduzzione, dizziunarii in cuntestu, scrittura intutitiva, ecc, dèvenu esse accessìbili à tutt’ognunu. Finiscu cù u rollu ch’ella deve acquistà a lingua corsa in a cumunicazione internaziunale ; una lingua latina cum’è a nostra ci apre à più d’una migliarda di lucutori in lu mondu sanu. Avemu pane è cultella da riesce !
Chì sò i prugetti per andà più in furia è di manera più efficace, è cosa dèvenu fà i nostri lettori per sustèneli ?
A prima cosa hè di parlà a lingua. D’ùn aspettà sempre ch’elli fìanu e strutture offiziali. A segonda hè di riclamà una pulìtica linguìstica puntellata è energica. In ciò chì cuncerna à Scola corsa, apprufittu di u vostru gentile invitu da lampà a nostra tradiziunale chjama à i sottuscrittori chì ci aiùtanu da u principiu, ringrenzièndula una volta di più. Cresce annu per annu u nostru bugettu è ci tocca à assigurà più ch’è mai i 30% di cofinanziamentu chersi da a lege, sottulineendu a manna cunseguente di a CdC (70 %) è di e merrìe chì ci aiùtanu (10 %). Intraprese è particulari ci dèvenu stà à latu per perennizà una dimarchja plebiscitata da a sucetà è chì hè una vera offerta di serviziu pùblicu làicu è apertu à tutti, di qualsìasi mezu suciale o orìgine. À ognunu addirizzemu un calurosu ringraziu in anticipu ! •
*Per sustene à Scola Corsa
Scrivite i vostri figlioli in e scole di Bastia, Biguglia, Corti, Sàrula Carcupinu o Lucciana, chjamentu u : 0629657642
Mandate u vostru sustegnu finanziariu, cù mezu securizatu in lìnea : http://www.helloasso.com/associations/scola-corsa
