Dapoi u 1981, e ghjurnate di Corti ricèvenu delegazioni di partiti è muvimenti indipendentisti di u mondu sanu. Sì i Catalani, Baschi è Irlandesi sò avvezzi à abbuchjassi i sulleoni curtinesi, forse sì viderà un annu una delegazione califurniana ?
Dop’à u Brexit, u Calexit ? Hè statu autorizatu u 26 di ghjennaghju scorsu u lanciamentu di a racolta di signature per l’organizazione d’un referendum nant’à l’indipendenza di u statu americanu. Per quessa, ci ne vole 600.000.
Perchè quallà dinù, ci sò l’indipendentisti. Lanciatu in u 2015, Yes California hè un muvimentu chì si batte per l’urganizazione d’un referendum nant’à a creazione di a Repùblica di California.
Un statu à parte
Bon d’accordu, l’argumenti ùn sò micca veramenti i listessi ch’è in Corsica.
Ùn si parla micca di Statu americanu assassinu, di lingua califurniana in perìculu, di califurnizazione di l’impieghi.
I partigiani di a scappera, liberali è aperti nant’à u mondu, si tròvanu in disaccordu cù u restu di l’Amèrica, ghjudicata troppu cunservatrice.
Ci vole à dì chì a California hè un Statu speziale. Prima, hè una putenza ecunòmica. À ella sola, saria una putenza mundiale. Ùn hè micca custì ch’ellu ci vole à circà una leia cù a Corsica.
Prugressisti, à a punta per l’eculugia, a tradizione hè chì a California voti pè i democrati. Hè cusì chì di nuvembre scorsu, avia legalizatu a cunsumazione di marijuana à usu recreativu.
I califurniani sò custì dinù luntani da i cunservatori americani… è corsi. Allora quandu l’Amèrica hà vutatu à Trump, u dibàttitu nant’à a sur tita di a California da i Stati Uniti s’hè rivittulitu.
Di dicembre, un sundame dave i partigiani di u Calexit à 32%. Ma a strada ver’di l’indipendenza hè tamantone. Per mudificà a custituzione americana, ci vulerà à cunvince 38 di i 50 Stati.
L’indipendenza hè torna appena luntana. Ma pè e ghjurnate di Corti, perchè micca ?
