E cunsequenze ecunòmiche di a crisa sanitaria in Corsica anu da esse tremende. Secondu à l’INSEE (lighjite l’edituriale d’ARRITTI in pàgina 3), a nostr’ìsula hè a regione di Francia chì soffre u più di sse cunsequenze ecunòmiche. È ancu, Francescu Alfonsi chì cummenta l’inchiesta per ARRITTI, ùn parla chè di certi puntelli ch’ella hà studiatu l’INSEE. Ma a situazione hè bella più grava torna, è si verà forse da quì à pocu, s’omu cuntabilizeghja l’impiecati di a stagione turìstica. Ghjente più o menu dichjarati, ch’ùn sò ancu pigliati in contu da e statìstiche di l’impiecu è di a puvertà. Puru, numarosi sò i curciarelli chì travàglianu solu pè a stagione (sopratuttu frà a nostra ghjuventù) è chì anu ciuttatu d’un colpu ind’è a precarità. Listessu custatu ind’è u sport, pè u più u sport amatore, ancu sè i prufessiunali dinù sòffrenu di a situazione. Mondu club di sport cullettivu anu da sparisce in 2021 per vìa ch’elli ùn ponu più assicurà ricette pè u so bugettu di funziunamentu. Sopratuttu sè no turnemu à cunfinà… Per avà, più o menu (è più menu chè più), e cullettività territuriale è u sponsoring pòrghjenu un pocu di sustegnu. Ma da quì à pocu, a regione, e cumune, l’imprese, ùn ghjunghjeranu più à mette a manu in stacca… A pèrdita di i licenziati hà da vene in furia anch’ella, i sustenitori di u ghjocu à pallò, u rugby, u volley, eccèttera, chì ùn ponu più vede i scontri, ùn ghjunghjeranu à rinuvellà u so sustegnu. È ancu s’elli anu un amore tremendu pè u so club, cum’è per un dettu l’accaniti di u Sporting Club di Bastia, saranu tocchi dinù da a crisa è ùn puderanu forse ripiglià a so carta pè a pròssima stagione. Ancu assai ch’ellu ci sò i Socios, o azzioni da tutte e mamme chì permèttenu à i club pro per avà di tene u colpu. In Corsica, u sport impieca assai mondu è parechji frà elli piglieranu a strada di Pol’Impiecu. Dinù, in u mondu assuciativu, ch’ùn hà più listessu funziunamentu dapoi un annu ch’ella hà schiattata sta crisa sanitaria. Ùn ci hè più soldi chì èntrenu ind’è casci di l’associ. Senza parlà di a cultura induve a Corsica conta assai intermitenti, più o menu dichjarati torna. L’associ o l’imprese impegnate à urganizà l’evenimenti, e manifestazioni, e serate culturale, sò in gattivu statu. L’artisti ch’ùn si prudùcenu più annant’à a scena, ch’ùn tròvanu più ne u so pùblicu, nè u sustegnu abituale di l’imprese private, sòffrenu è anu da soffre torna assai.
È noi, ch’avemu da diventà senza cultura ? Senza u cantu, a mùsica, u teatru, u ballu, u scàmbiu, di sse serate nustrale ? Senza ss’arrichiscimentu, senza ssu nutrimentu di l’ànima, senza pudè gode è cresce di ssi tempi di cumunione è di spartera ? À u mumentu di mandà ssu nùmaru d’Arritti à a stamperìa, si parlava di più in più d’un terzu cunfinamentu. A saperemu màrcuri sè no ci chjudimu torna in casa o nò.
Curagiu è forza à tutti. •
