L’associu Scola Corsa svilupa in Corsica una dimarchja d’insignamentu immersivu in lingua corsa, annant’à u mudellu digià messu in ballu da Seaska in Paese Bascu, o da Diwan in Brittania.
I sculari, iniziendu u so parcorsu in e classe materne, sò ciuttati in un ambiente esclusivamente corsofunu à ogni mumentu di a vita sculare (lezzioni, riecreazione, ghjochi, cantina, guarderia, attività, surtite…) Tuttu hè fattu da chì u zitellu sia, tuttu u tempu, in situazione di sente o di praticà a lingua è ch’omu stia, à listessu tempu, attentu à i so bisogni.
Per amparà a lingua, ùn ponu bastà unepochi d’ore d’insignamentu à simana. In a dimarchja immersiva, hè valurizata a lingua corsa, cun assai mutivazione, ciò chì permette à u zitellu di campà a pluralità, a ricchezza è l’uriginalità di a cultura corsa.
L’intruduzzione prugressiva è criscente di u francese in u quatru immersivu permette à u zitellu d’ammaistrà e duie lingue à a fine di u primariu. U zitellu, oramai bislinguu, sviluppa tandu e so capacità d’amparera d’altre lingue.
Principià l’amparera di a lettura cù a lingua corsa ùn hè micca più cumplicatu. Pròpiu à l’incuntrariu, vene più sèmplice : ci hè, in lingua nustrale, una currispundenza trà grafìa è funìa, invece chì, in francese, un stessu sonu pò esse scrittu di parechje manere (o, au, eau… per u indettu.) Una volta acquistate e base di a scrittura in lingua corsa, u zitellu ampara di manera più fàciule l’altre tappe più cumplicate di a lettura/scrittura in lingua francese.
E scole di Scola Corsa sò làiche è gratuite è ambiziunèghjanu di passà sott’à cuntrattu d’assuciazione cù u Statu. Sta ricunniscenza ufficiale permetterà di pagà l’insignanti da u ministeru di l’Educazione naziunale è di seguità i prugrammi ufficiali (vìsite di l’ispettori di l’Educazione naziunale). L’elevi di Scola Corsa passeranu l’esami (brevettu, bascigliè) cum’elli a fàcenu digià l’elevi di Seaska o di Diwan. I risultati ch’elli ottènenu in Paese Bascu o in Brittagna sò superiori à a mediana accadèmica o dipartimentale. •
Per i rinsignamenti : www.scolacorsa.corsica
[email protected]
