U Rè Lione issendu malatu, tuttu u pòpulu animale hè invitatu à mandà delegazione, rende vìsita à u Gran’Lione.
Indirizzu di u Rè chì hà pocu laziu : un’di e « grotte di Bunifaziu »…
U 25 d’Aprile, di e Volpe a delegazione falava i scalelli di u Rè d’Aragone. Capu machja, Vulpina, spezialista in fatti di gallina… Davanti à a grotta, dui lupi tutti fieri… Allora vulìate vede isse chjocche d’infirmieri, raprisintàtevi dui impiecati di a Parcizzione, è avarete un’idea di a situazione…
– Entrate, Signor’Volpe, voi avete a fede… Li farà gran’piacè quand’ellu vi vede…
– Pianu… ùn ci hè nulla di prissatu… è ùn hè colpa mea si Lione hè malatu. Guardu a traccia di i passi… Ne hè intratu, ghjente ghjunta à inchietassi, ma duva sò e tracce di u ritornu ?
Quì dentru, dev’èssenu (1) cum’è ind’un fornu.
S’ellu si passa cosa pensu, ùn ci hè male : ùn ci hè più una grotta, è un ispidale, diciarè à u Gran’Fattor’di lege, ch’ellu vachi à fassi leghje…
Li diciarè di prizzà a me paura, sì Lione hè malatu, s’ellu crepa, cripatura…
Muralità
Isse tracce sò cum’è quelle di Ponte Novu…
Un passu di ritornu, nisun’l’hà mai più ritrovu. •
- Dev’essenu o devessenu : virsura righjunale par « dèvenu esse ».
