À tè, u contrabanderi
cacciadori d’inghjustizia
braccuneri di virità
trafficanti di cuncetti
di libri vivi
di libri novi
di libri da brusgià
fatti di paroli
da leghja à u ventu
À tè chì culurisci a storia
di tinta pruibita
pittori di sensi arcani
viaghjadori mai saziu
marinaru di l’immersu
cusgidori di fili suvversivi
sartori di l’umanu
À tè, u passori
U traghitaghju
di robba nustrali universali
Camallu mai stancu
sutt’à u pesu di l’oghji senza urizonti
sutt’à a sciappa di l’incapiscitura
Stà quì
volta à campà di più
puri in i malanni di u disprezzu
puri in u vituperiu di a vechja malintesa
puri in l’odiu mai stanciu
di a riprissioni ceca
Tandu
Ci mittaremu torna
à trafficà l’idei
à truvà i calanchi piatti di u francà
i barcaghji
i foci
i chjassi scunnisciuti
i notti più bughji
à prò di quiddi lumi fasciati in i libri di dumani. •
