À tutti quelli chì ci màncanu, dedichemu sti versu d’un bellìssimu cantu scrittu da I Fratelli Vincenti, cantatu da tanti artisti famosi, da Antone Ciosi cù parechji altri cantadori cum’è Ghjuvan’Claudiu Acquaviva o Diana Salicetti, à Maì Pesce cù Maurane, o ancu artisti libanesi in memoria di e vìttime di e splusioni di 2020 in Beyrouth, Pascale Ojeil è Charles Eid.
Arritti a dedicheghja à Yvan è à i soi, parenti è amichi ch’ùn ponu esse guariti da l’inghjustizia chì l’hà minatu.
À l’altru mondu, u tempu hè longu, ci stà l’eternità
È m’hà pigliatu à tempu natu ; di mè, chì n’hà da fà ?
O cara mamma, u paradisu hè grande cume tè
È s’e ti chjamu à l’improvisu s’arricummanda à mè
Santa Marìa a to sumiglia ùn nu mi lascia più
È mi cuntentu è mi ramentu, cume s’ell’era tù.
Ti mandu un fiore, u so culore, u sceglierai tù
Hè ind’u pratu di u Muratu ch’ellu face u più
S’e fussi eiu frà i più belli u cuglierebbi à tè
Ma stocu in celu, è i to capelli sò luntanu da mè
Ma i t’allisciu cù Ghjesù Cristu chì sà quale tù sì
È mi cuntentu è mi ramentu, è megliu ùn possu dì.
Ùn piglià dolu, u to figliolu cù l’ànghjuli stà bè
È ciò ch’e vogliu, u mio custodiu a sà prima cà mè
Quì l’aria fine cume puntine cosge senza piantà
Ore tranquille, à mille à mille, senza calamità
À l’altru mondu, canta un culombu è paura ùn hà
Per cacciadore ci hè u Signore, O mà ùn ti ne fà. •
