Si pudìa chjamà L’amore di i mei, issu bellìssimu cantu di I Chjami Aghjalesi. Una lingua parla spessu d’amore è di puesìa. A lingua di i mei sò i valori è e lee chì ci tènenu stretti è ci ramèntanu ciò chè no simu. Tramandèmuli à e generazione di i sèculi à vene.
In core di i mei ci dorme l’allegria
Puru quandu a vita inciampa i so passi
Ci dorme tant’amore è tanta puesia
Ancu s’elli so zitti o s’elli stanu bassu
In bocca di i mei ci stanu mille fole
Da cuntami li tempi di tutte le sumiglie
Chì tèssenu a leia nant’à un filu d’amore
Mentre a vita corre è strappa ogni briglia
In manu di i mei hè scrita a spartera
In lèttare sulcate da e cugliere andate
Hè dettu lu travagliu è po la straziera
Per fà cresce piu belle e so nove bìate
In l’ochji di i mei ci vecu tante frante
Tant’amori pertuti à l’eterne credenze
Una manera d’esse, une feda tamanta
Tuttu cio ch’hè amore è chi pare viulenza
In casa di i mei ci canta una lingua
Vechja quant’è terra induve elli so nati
È vulìa d’amore scrive’sse duie rime
Dilli quant’è so fieru d’avelli à lu mio latu
È vulìa d’amore scrive’sse duie rime
Dilli quant’è so fieru d’avelli à lu mio latu. •
