Cù ss’ùltimu nùmaru di l’annata 2025, cumpiemu quì a nosta rubrica da cuntà i tesori di a nostra lingua à traversu l’Antulugìa di e spressioni corse di Farrandu Ettori. Tenìtele in mente cari amichi lettori, lighjite libri cum’è quessi nant’à i detti è i pruverbii, chì sse spressioni ci impàranu assai nant’à a nostra stòria è ciò chè no simu. Omu si deve di tramandale.
Secondu à Pruvidenza, a manu di u Signore hè sìa vendicatrice, sìa prutetrice, dice Farrandu Ettori. Hè stata a man di Dìu, si dice quandu un miserosu hè casticatu ghjustamente.
Ma, dice torna Farrandu Ettori, a manu di u Signore pò esse ancu paternale. A sola cosa chì un Cristianu pò dumandà in e so preghere, dicìa a vechja zìa di l’autore in u 1966, à l’età di 98 anni, ghjè chì u Signore la manteni a manu nant’à u capu : chì u Signori li tenga a so mani in capu.
À u cuntrariu, dice torna u scrivanu, quand’omu s’hè persu, ch’ellu spula u so patrimoniu, o ch’ellu tomba un antru cristianu senza cagione, i vechji capighjendu, dìcenu : u Signori l’hà cacciatu a so man di capu. •
U signore hè passatu quì di notte
Dìu, u Signori, o di manera più familiare, Quellu quassù hè, u creatore di u mondu. Dice Farrandu Ettori, sè qualchi pezzu di a creazione ùn hè parfetta, ghjè chì u Signore hà travagliatu di notte. Secondu u pruverbiu dinù : Travaddu di notti, risa di ghjornu, ch’omu sciaccava à quella ch’avìa cuscitu o riccamatu à u lume debulellu di a lampa à l’ogliu.
A creazione pò dinù risente a fatica di u creatore, dice torna Farrandu Ettori, o di sfinimentu di materiali di qualità, ciò ch’hè accadutu à trè malorosi paisani, secondu a malignità di i so vicini :
Sari, Conca è Lecci
L’ùltimi chì Dìu fece. •
