Più ch’un cantu, eccu un pientu, mai stanciatu. Lagnu d’un pòpulu, scrittu da Ghjuvan’Tèramu Rocchi, messa in mùsica da Ghjuvan’Clàudiu Acquaviva, cantata da A Filetta, in memoria di i 12 impiccati di u Niolu sott’à a rippressione francese di u diciottèsimu. Tamanta ferita, testimonia di a suffrenza è a dignità d’un pòpulu.
Se vo’ ghjunghjite in Niolu
Ci viderete un cunventu
Di u tempu u tagliolu
Un ci n’hà sguassatu pientu
Èranu una sessantina
Chjosi in pettu à u spaventu.
Dopu stati straziati
Da i boia, o chì macellu !
Parechji funu impiccati
Ci n’era unu zitellu
L’anu tuttu sfracillatu
E’ di rota è di cultellu
Oghje chì hè oghje in Corscia
Fàteci casu una cria
Si pate sempre l’angoscia
Intesu di Marcu Maria
Era quessu lu so nome
Mancu quindeci anni avia.
Se vo’ ghjunghjite in Niolu
Ci viderete un cunventu
A brama d’ogni figliolu
A ci dice ancu u ventu
Libertà libertà sempre
Dopu à tamantu spaventu.
