U rollu di l’aiute materne à u latu di l’insignante hè fundimentale. Assicurèghjanu cù elle u svegliu à a lingua di i ciucci è si sà quant’ellu impurtante. L’accumpàgnanu per tutte l’attività fora di u tempu di scola dedicatu à e maestre. Vale à dì accòglienu i zitelli è assicurèghjanu a guarderia in principiu è in fine di ghjurnata, ghjòcanu cù elli, è si n’occùpanu durante a recreazione, sò quì torna à a cantina quand’elli mànghjanu, i pòrtanu à u pisciatoghju, i cùranu durante a siesta, accumpàgnanu e maestre pè e surtite sculare, ecc. Vèghjanu à a securità di i zitelli è à a pulizzìa di i lochi dinù, è ùn còntanu u so tempu chì sò entrate cù intusiàsimu in u prugettu anch’elle !
U so travagliu hè dunque da salutà. E duie prime aiute materne di Scola Corsa sò Sandrina Gaspari (detta Zaza) in Biguglia è Alyssia Taddei in Bastia, da ringraziale assai pè u so impegnu ! È quist’annu saranu trè aiute materne in più pè a rientrata 2022 ! •
