Scola Corsa hè a dimarchja a più strutturante chì u naziunalìsimu corsu appia impulsatu in 60 anni di lotta. Pè a lingua corsa, ma dinù per tuttu ciò chì raprisenta ssa lotta di vuluntà d’esse. Nata in 2021, cù i so dui primi siti di Bastia è Biguglia, Scola Corsa s’hè un pocu rifrenata in e creazioni di siti per via di l’ingagiamentu à rinculu di u Statu. Puru, a vuluntà di i parenti hà raghjunta quella militente, àprenu scole, accòglienu zitelli, s’impègnanu l’insignanti, mèttenu manu in pasta parenti è caccari : u retale cresce è pruduce risultati dapoi 5 anni !
Oghje sò centinaie i capi d’imprese, e cumune, di tutte e famiglie pulìtiche, chì sustènenu Scola Corsa è chì a vòlenu vede ingrandà in fùria. A pedagugia di Scola Corsa hè efficace, i zitelli pàrlanu corsu, cù e maestre, ma dinù trà d’elli è quand’elli vòltanu in casa, a trasmissione si face naturalmente è ghjè un custatu magnìficu. A pedagugia Scola Corsa pruduce dinù zitelli spannati, allegri, astuti. Hè addimessu da tutti i linguisti : l’insignamentu immersivu hè un prò tamantu per l’imparera di e lingue, ma dinù pè u sviluppu di i cerbelli. Eppò, per noi altri militenti di a Corsica, hè un penseru di pudè trasmette di più chè a lingua, una cultura, una stòria, un ànima corsa chì custruisce u pòpulu corsu di dumane. Hè ciò ch’ellu face u retale Scola Corsa, fendu cunnosce à ssi zitelli i sapè fà agrìculi per un dettu, o imparènduli a storia è a geugrafia corsa, ecc.
Scola Corsa, u so avvene, u so sviluppu, sò inghjochi di a rientrata 2026. Anna Catalina Santucci, direttrice di a Federazione, ci spieca cù sèriu è determinazione à chì ne simu di ssa magnìfica operata nustrale.
Scola Corsa appronta a rientrata, cumu si prisenta malgratu tutti i capatoghji ch’avemu francatu per mantene vive e nostre scole ?
A rientrata s’appronta cum’è di sòlitu cù seriu è travagliu. Ci vole per ogni situ arregistrà e scrizzioni nove, riguarà ogni ducumentu necessariu pressu à e famiglie chì tutti i cartulari siininu pronti per settembre. E direttrice di siti anu u so dà fà da mette in òrdine l’aspetti amministrativi.
E maestre anu approntatu e cumande di materiale pedagògicu è mubiliare è travàglianu à mette in forma i prugetti pedagògichi è e sequenze è seenze pruposte à i sculari. Tradùcenu, adàttanu è soprattuttu creanu materiale efficiente per i nostri elevi.
Emu discutatu di tutti sti punti in un bilanciu pedagògicu chì hà addunitu tutte è tutti i nostri maestri in principiu di lugliu.
L’associ lucali dinù sò mubilizati postu ch’elli sò elli à gestisce e scrizzioni, u sèguitu è l’aspettu cuntàbile di i servizii di cantina è di guarderia. Emu cù l’aiutu principale d’un babbu è di ghjente cumpetente fattu sviluppà un’appiegazione specìfica chì permette à e famiglie di gestì a frequentazione di i so figlioli pressu à i serivizii perisculari in diretta. Era digià in anda in Bastia è Biguglia quist’annu è u dispusitivu serà allergatu à l’altri siti, cù ancu di più funziunalità di settembre.
Aprerà un antru situ ? È quantu zitelli feranu a so rientrata quist’annu per quantu insignanti ?
Hè un antru puntu essenziale, u riclutamentu da cumplettà a nostra squatra à livellu di i furmadori ma dinù di l’altri interventi : aiute materne è agenti di vita sculare. Ogni postu hè statu pruvistu, a scelta ùn hè stata cusì fàciule ciò chì mostra ch’elli ci sò candidati di qualità interessati à raghjunghje a dinàmica. Seranu 38 impiegati di a squatra educativa è 3 amministrativi à accumpagnà i nostri sculari quist’annu.
Sott’à l’impulsione di famiglie è cù a vuluntà d’una di e nostre maestre sperimentate s’aprerà un situ novu in Serra di Fium’orbu. Stu prugettu benefizieghja di l’appoghju di a sucetà civile è di a squatra municipale ch’è no ringraziemu per u so impegnu.
Cù i 7 primi sculari fiumurbacci seranu guasi 270 zitelli à benefizià d’un insegnamentu immersivu integrale in un ambiu di scola assuciativu, dunque
più di 250 famiglie à impegnassi in u prugettu.
I parenti si sò impegnati assai per fà sente a vostra voce. Ghjè un bellu appoghju pè a dinàmica di e scole ?
Bella sicura ! L’impegnu di tutti, genitori, parenti, culturali, imprese è sucetà civile di Corsica è d’altrò in ste stonde di tensione hè statu essenziale. Ci hà permessu di strappà e misure chì permetteranu d’apre di settembre i nostri sei siti.
À livellu di i genitori, chì si sò impegnati in a mossa di vàrie manere, anu mostratu cusì ch’elli anu à core di persegue a scularità di i so figlioli in Scola corsa. Ci hè da ralegràssine, vole dì chì u mudellu viaghja è cunvene à e famiglie. I zitelli sò felici d’andà in classa è a scola ùn hè solu locu d’amparera ma dinù d’addunita suciale, di scontru è di scambiu assuciativu.
Sta dinàmica hè impurtante assai ch’ella sia da fà campà l’associ, aiutà à a gestione di e scole o racoglie fondi da perennizà u prugettu.
Avete francatu u livellu di u corsu elementariu, cù l’imparera di a lettura per un dettu, i zitelli si ne sòrtenu bè ?
A lettura hè avà accustata in tutti i nostri siti. A lingua corsa hè funètica assai ciò chì permette à i sculari d’entre prestu in a prelettura in scola materna è d’esse capace à cudificà/scudificà di manera naturale è guasi senza sforzi. A lettura capiscitura di testi di più in più cumplessi si persegue à u CE1 è s’intrudùcenu dinù à stu livellu i soni specìfichi à u francese. I nostri sculari si sbròglianu piuttostu bè in e duie lingue è i resultati à e valutazioni naziunale sò stati interessanti.
In quantu à i livelli accustati, cum’è di sòlitu Serra pruncipierà cù zitelli di Piccula Sezziò, Corti aprerà u so CP, Biguglia è Sàrrula u CE2 è Bastia a nostra prima classa di CM1 ; ci avvicinemu dunque pianu pianu di u cullegiu.
In tantu chè direttrice cunnosci bè i bisogni, cosa manca per rinfurzà a dimarchja ?
Simu felici quist’annu d’avè a nostra prima laureata di u cuncorsu specìficu à Scola corsa di prufessore di e scole. Hè una ricunniscenza maiò per e.i nostre.i giovane.i maestre.i, permette d’assicurà u so postu è dimostra di a qualità di e so cumpetenze. Speremu avè l’apertura di qualchì postu torna à stu CRPE quist’annu, chì i nostri maestri siinu titularizati cù l’Educazione naziunale.
Cum’è in tutte e scole u pùblicu scularu hè vàriu è emu Elevi à Bisogni Educativi Particulari chì anu bisognu d’un appoghju cumplementariu. E nostre classe cuntrattualizate ponu benefizià di certi arnesi ch’ellu hà u publicu cum’è l’AESH ma ùn emu per disgrazia dirittu à l’accessu à i psichologi sculari, i maestri spezializati è d’altri dispusitivi ciò chì hè quantunque difficiule à accettà. Una volta cuntrattualizati i nostri sculari, e so famiglie è e nostre squatre pedagògiche duverianu dispone di listessi arnesi chè l’altri citatini. A cuntrattualizaione di i cunsiglieri pedagògichi ci hè dinù per avà ricusata. L’inseme di u retale Eskolim si batte da fà ricunnosce sti posti essenziali à una scularità di qualità per l’elevi chì fàcenu a scelta di l’insignamentu assuciativu immersivu.
Da permette à a dimarchja di campà emu cumu a sapete bisognu di securizà u retale, ch’ella sia à livellu giuridicu o finanziariu, speremu dunque ch’elle seranu trove suluzioni perenne è invitemu tutti quelli chì crèdenu in stu prugettu à pòrghjeci u so sustegnu, qual’ellu sia. •
