Eccu unu di i più belli canti corsi. A strada di l’omu induv’ognunu pò ricunnòscesi è bramà lindumani più belli. À tè omu o donna corsa.
À tè chì canti solu nantu à e sponde murtale
Tù chì pensi chì l’omu campa vicinu à u male
Tù chì cerchi l’eternu in un celu ammantatu
Tù chì credi in un mondu di miseria spugliatu
Sappia chì a salvezza
Hè fatta di dulore
Ch’ùn esiste ricchezza
Chì campa più d’un fiore
Cum’è a lumera è l’ombra ch’ùn s’accordanu mai
Ùn ci hè amore umanu ch’ùn sia fattu di guai.
Tù chì cerchi a stella d’un populu spapersu
Cum’è un agrottu santu postu in l’universu
Tù chì cerchi e chjave di e cose suprane
Cum’è quellu esiliatu chì brama e so campane.
Tù chì porti a to pena circhendu un testimone
Cum’è l’incarceratu in le triste prigione
Tù chì cerchi furtuna campendu à straziera
Cum’è un paesu vivu chì si batte è chì spera.
Sappia chì a salvezza
Hè fatta di dulore
Ch’ùn esiste ricchezza
Chì campa più d’un fiore
Cum’è a lumera è l’ombra ch’ùn s’accordanu mai
Ùn ci hè amore umanu ch’ùn sia fattu di guai.
