L’amore di i Corsi pè u so paese hà francatu sèculi è guai. Fiertà di i so lochi, fiertà di a so stòria, fiertà di a so lingua è a so cultura, i Corsi fèrmanu attaccati à a so terra… a dice à a so manera stu bellìssimu cantu di I Muvrini. À tè Corsica, à tè pòpulu, à voi i prigiuneri, à voi i sacrificati d’una stòria di strazii è di lotte. Ghjuventù nè sì l’ereda.
Ghjè per à pena dì campà
Ch’elli si mettenu in penseri
Ch’elli si mettenu à marchjà
Mezu à le brame è l’addisperi
Quand’elli sò da mare in là
Anu li cori prigiuneri
Ma tù i sai fà vultà
Di tè quantu elli ne sò fieri
Corsica
Corsica
Gloria à tè
È per à pena di sperà
Falanu pieni li carrughji
Ti parlanu di libertà
Quante vittorie in li so mughji
È quand’elli mettenu à dì
Inseme listessu curagiu
Pè ciò chì ferma à custruì
Faci cun elli lu viaghju
Corsica
Corsica
Gloria à tè. •
