U martòriu è a suffrenza di i parenti di Lyhanna ùn hè ancu à finì. Ogni anniversariu, ogni locu, ogni ricordu venerà cum’una cultellata in core. U risultatu di l’autopsia serà un dulore di più, cum’è tutte e rivelazioni di l’inchiesta, eppò l’intarru… mai una mamma, un babbu, ùn duverìanu purtà a salma di a so figliola, ancu di più una zitelletta di òndeci anni ch’hà suffertu l’abuminazione. Pò venerà u tempu di u prucessu. L’anni feranu u so travagliu per circà di cicatrizà sta pena tamanta ma l’irreparàbile ùn pò esse sguassatu, tutte e belle prumesse di vita di Lyhanna li sò state arrubate, a ciuccia ùn hè più.
U so martoriu hà svegliatu in Francia una còllera sapendu ch’ellu ci n’hè statu cusì tantu nanzu à ella è sapendu pè u più ch’omu pudia parali. U ministru di a ghustizia hà palisatu 70.000 lagnanze micca trattate per altretante vìttime di viulenze sessuale. Parla di disfunziunamentu è s’inzerga contr’à i precuratori. À stu livellu, ùn hè più disfunziunamentu, hè una generalisazione. Face anni è anni ch’omu risparmia nant’à i mezi di funziunamentu di a sucietà. A salute, a ghjustizia, a scola, a securità, u benestà suciale in generale ne patìscenu. Sempre di menu funziunarii, lege chì vènenu aghjustassi à d’altre lege, evaluazioni micca, è i ministri chì si seguìtenu pàrenu più occupati à lascià u so nome à una lege piuttostu chè di mette in ballu prucedure chì seranu efficace in vera. Assistante suciale hè una prufessione in traccia di sparisce, nanzu ci n’era in tutte e scole, in tutti i quartieri. Di fatti tuttu ssu disastru suciale palesa più chè un mancu di mezi. Un mancu di priurità. I scàndali di u sistema suciale glubale di a prutezzione di a zitellina còntanu anch’elli ssu mancu di priurità. Zittelli cacciati à i so parenti per via di a so messa in perìculu sò messi in perìculu da l’amministrazione in càrica di a so prutezzione. U cusì dettu Aiutu suciale à a zitellina (ASE) i piazza in stabilimenti o in famiglie d’accolta induv’elli sò maltrattati, ciambuttati da una struttura à l’altra, suvente drugati, viulentati, prustituiti…
Micca tutti ancu assai. È numarosi impiecati di l’ASE fàcenu un travaglione, ma l’istituzione hè cusì à l’abandonnu è sregulata chì ciò ch’ùn và micca oghje supraneghja ciò chì funziona. Un quartu di a ghjentarella chì campa in i carrughji sò anziani zitelli di l’ASE ! Ghjè a metà frà quelli ch’anu trà 18 è 25 anni. Zitellette minore sò piazzate in albergu per via chì l’ASE ùn hà più piazza in e so strutture. Fèrmanu tandu senza surveglianza, à diventà e prede di i ruffiani. Ssi custati bàstanu à dì quantu a zitellina hè tralasciata in Francia. Allora ch’ellu ci hè una vera epidemia di pedufilia in a sucietà. Induv’ellu ci sò zitelli, ci sò pedofili. In e scole, in l’animazioni suciali, in i club spurtivi, in i centri di vacanza… i predatori sò dapertuttu è a sucietà i prutege di fatti, per via chì u zitellu ùn hè a so priurità. Cum’ella prutege l’omi ch’ùn rispèttanu e donne. Qualchi annu fà, a Cumissione indipendente contr’à l’incestu è e viulenze sessuale (Civise) hà postu un raportu impurtantìssimu prupunendu 80 misure per luttà contr’à e viulenze fatte à i cinini. U ghjùdice Durand, specialista per via di u so mistieru di sse viulenze hè statu rimpiazzatu à a presidenza. È u raportu oghje, nimu ùn ne parla più. 160.000 zitelli ogni annu sò vìttime di viulenze sessuale. 5,5 millioni di personi maiò sò state vìttime di viulenze sessuale in a so zitellina. 70 % di e lagnanze in Ghjustizia fèrmanu senza sèguita. Solu 3 % di i pedocriminali sò dichjarati culpèvuli.
Donne è cinini dèvenu esse a nostra priurità. Hè un duvere assulutu di fronte à l’avvene. •
