L’Amèrica ci inchieta, ma hè dinù colma di risorza è di gèniu umanu. Ci hè sempre di chè avè fede in l’Umanità ! Parlàvamu a settimana scorsa di e « cità santuarie » chì scumbàttenu contr’à e scimizie di Donald Trump… San Francisco, Boston, Chicago, New York, Los Angeles, Berkeley, Oakland… vòlenu firmà « sè stessu»…
« Simu i guardiani di a nostra demucrazìa »… hà dettu San Francisco ind’una risuluzione induv’ella accerta cundannà « i crìmini è i discorsi d’odiu » è vulè difende i valori di l’Amèrica ! È u presidente di i Stati Uniti ùn arriesce cusì à impone a so lege pèssima è disprezzosa.
Frà i penseri di uni pochi d’Americani oghje (è di u mondu!) ci hè u ciambuttamentu climàticu. È i Stati Uniti sò frà i più pulluenti di a pianetta. Obama avia riesciutu à cambia un pocu di versu, ingagièndusi à riduce e so emissioni di gasi à effettu di serra. Hè statu una bella avvanzata, ma per disgrazia u novu presidente americanu hà piantatu tutte sse belle risuluzioni. Ancu assai, certe cità o paesi di i States adòpranu altri cumpurtamenti. Cusì hè Détroit. A bella cità di u Michigan hè oghje un mudellu d’agricultura urbana. In 2011, era in ruvina ecunòmica cù una disertificazione industriale è sin’à 18,5 milliardi di dòllari di dèbitte in 2013! In certi lochi, a disuccupazione cullava sin’à 50%! I citatini si sò dati di rimenu per inventassi un antru mudellu di sucietà. Frà e misure indiate, a messa in ballu d’un agricultura urbana.
Cusì, Détroit s’hè datu un grande quartieru agrìculu in cor’di a cità. Hè statu battizatu AgriHood (quartieru agricolu) è urganizatu di manera assuciativa, da u Michigan Urban Farming Initiative (l’iniziative d’orti urbani di u Michigan). Hè un prugettu durèvule, bio, lucale, di prussimità è gràtisi ! Minati da a crisa ecunòmica, a ghjente di Détroit anu avutu ss’edea di cultivà elli stessi i so legumi è a so frutta. À a periferìa abbandunata, induv’ellu s’hè vistu nasce «quartieri mortulone» cù case viote è carrughji diserti, hè statu creatu un èttare di giardini, cù un arburetu di 200 àrburi à frutta, un ortu sensuriale pè i cinnini, un cafè cumunutariu, un centru educativu… L’ortu urbanu funziona cù vuluntarii. Ugnunu pò vene à zappà, piantà, raspà, nettà, è racoglie cum’ella li pare. L’ortu hà già pruduttu più di 22 tunnelate di prudutti freschi è gràtisi per più di 2000 famiglie in u bisognu. A particularità di l’ortu di Détroit hè a so dimensione. Esìstenu l’orti urbani ma grande cum’è quessu è cusì abburdèvule, innò. In altrò l’orti sò fatti da ghjente ch’anu i mezi è chì cèrcanu à passà u tempu. I prudutti tandu sò venduti, è piuttostu cari. In Détroit, u scopu hè di nutrisce quelli ch’anu u bisognu. I prudutti sò gràtisi. Hè per quessa chì l’iniziative interessa assai in Amèrica induve l’insicurezza alimentaria tocca 13% di a pupulazione.
AgriHood porta a prova ch’omu si pò nutrisce a ghjente in cor’d’una cità, è ch’un quartiere sanu pò ghjunghje à l’indipendenza alimentaria ! U filmu «Demain » di Cyril Dion è Mélanie Laurent conta a stòria di Détroit. Cinque anni dopu à i primi passi, si conta 1600 orti in a cità chì ferma un’di i più belli esempii di pruduzzione è di cunsumazione cullaburative in u mondu !
Yes we can !
Fabiana Giovannini.
