L’Amerindiani sò i primi pòpuli à avè occupatu l’Amèrica. In Amèrica di u nordu, i più cunnisciuti sò l’eschimesi è l’inuiti… o torna l’indiani di quelli tempi di i cowboys… i Navajo, i Cheyennes, i Sioux, i Cherokee, eccèttera. In Amèrica di u sud, sò mondu ssi pòpuli è si còntanu à decine, pè u più in Amazunìa, à u Brasiliu, in Bolivìa, in Equatore. I Mapuche càmpanu elli à u centru suttanu di u Chili, o di l’Argentina. L’eredi di i pòpuli Incas si tròvanu à u Perù. Ma sò i pòpuli amazuniani i più sparsi è numarosi. Càmpanu in a furesta. À u Brasiliu sò decine di millaie à campà in furesta è certi ùn sarèbbenu mancu cunnisciuti, campendu in tutale autunumìa, senza cuntattu cù u mondu chè no cunniscimu noi, piatti o circhendu à piattasi à u più prufondu di a furesta… Càmpanu di a natura, cù a natura. Sò a natura. A furesta hè u so spaziu di vita, cum’è l’ària chè no rispiremu noi, anu un bisognu vitale di a furesta è di a so biodiversità. È sòffrenu di a sfurestazione, di e spluttazione minàrie, o petruliere, è di e minaccie di l’indùstriali chì strùghjenu centinaie di millaie d’àrburi ogni ghjornu, per piantà palmeti è pruduce l’oliu di palma da fà prudutti cosmetichi, carburanti, o cicculata à centinaie di tunnellate da furnisce l’usine mundiale di u Nutella. Sò strutte sse fureste dinù da permette l’allevu di bestiame à centinaie di millioni di vacime per nutrisce in carna l’Auropa. I fiumi è e tarre sò torna impuzzichiti di a ricerca miniera, oru, carbone, bossita, farru, ramu, cobaltu, ecc. E mine sò rispunsèvule di 35% di a destruzzione di a furesta amazuniana. Impuzzichìscenu in più i fiumi, e stese freàtiche, l’ària… Omu stima torna à 3600 prugetti minàrii in più in preparazione. E cuncessioni à l’imprese minàrie raprisèntanu à u Brasiliu 165 millioni d’èttari, frà i quali 60% cuncèrnanu a furesta amazuniana.
Hè cusì ch’elli sparìscenu l’orangutani è mondu altra biodiversità magnìfica, è ch’elli rincùlinu sempre più luntanu i pòpuli amerindiani… Pacifichi sò perseguitati, assassinati, avelenati, cuntaminati da malatìe ch’elli ùn cunniscìanu micca è chì l’impiecati industriali si pòrtanu cù elli. Ssi corci pòpuli ùn anu chè i so archi per difèndesi di pettu à i fucili è i trèmachi chì vènenu à sparghje a malamorte.
Allora, quand’elli anu sappiutu ch’elli avìanu da affaccassi à Belem i putenti di a pianetta per discute di a so salute à a COP 30, sti corci pòpuli anu vulsutu fassi sente.
A securità di a COP li hà difesu l’entrata è sò nati l’azzuffi. « Vulemu u nostru territoriu lìberu, ma u cumerciu di a spluttazione petruliera, minaria, o furestera, cuntinueghja » hà dettu Nato, u capu indigenu di a cumunità Tupinamba. « Per noi hè un mumentu di rivolta, d’indignazione, un mumentu induve noi, pòpuli autochtoni, risentimu a disfatta di a nostra terra ind’è a nostra carna ».
Ùn anu pussutu entre. Sò i primi cuncernati da u disastru di i ciambuttamenti climàtichi, e prime vìttime di a mundialisazione capitalista è di l’inghjustizia di a spluttazione di e ricchezze di l’Amazunìa… è sò firmati fora.
Stu solu fattu prefigura digià disgraziosamente, a disfatta di a COP 30. •
